نۇر-سۇلتان الماتى جەنە شىمكەنت قالالارىندا جۇمىس ٸستەپ جٷرگەن جاستارعا ساتىپ الۋ قۇقىعىنسىز باسپانانى جالعا بەرۋ 2025 جىلعا دەيٸن ۇزارتىلادى.
بۇل تۋرالى قر اقپارات جەنە قوعامدىق دامۋ مينيسترلٸگٸنٸڭ جاستار جەنە وتباسى ٸستەرٸ كوميتەتٸنٸڭ تٶراعاسى شاحماردان بايمانوۆ ايتتى, دەپ حابارلايدى قازاقپارات.
ونىڭ ايتۋىنشا, جۋىقتا عانا Government for zhastar عىلىمي-زەرتتەۋ ورتالىعىنىڭ جانىنان جاستاردىڭ مەسەلەلەرٸمەن اينالىساتىن الاڭ قۇرىلعان. وسى الاڭدا قازاقستاندىق جاستاردىڭ باسپانا مەسەلەسٸن تالقىلاۋعا ارنالعان شارا جوسپارلانىپ وتىر.
«نۇر-سۇلتان, الماتى, شىمكەنت قالالارىندا جۇمىس ٸستەپ جٷرگەن جاستارعا ارەندالىق باسپانا بەرٸلەتٸنٸن بٸلەسٸزدەر. بۇل باعدارلاما 2021 جىلعا دەيٸن جوسپارلانعان. اتالعان ٶڭٸرلەردە بۇل باعدارلامانى 2025 جىلعا دەيٸن ۇزارتۋ تۋرالى شەشٸم قابىلداندى», - دەدٸ ول پرەزيدەنت جولداۋىن تالقىلاۋعا ارنالعان اناليتيكالىق ديسكۋرس بارىسىندا.
ونىڭ سٶزٸنە قاراعاندا, ٶزگە ٶڭٸرلەردە دە وسىعان ۇقساس باعدارلامانى ٸسكە قوسۋ جوسپارلانىپ وتىر.
«2022 جىلدان باستاپ ٶزگە ٶڭٸرلەردە دە وسىعان ۇقساس باعدارلامالار ٸسكە قوسىلادى. قازٸردٸڭ ٶزٸندە 3-4 ٶڭٸر نيەت بٸلدٸرٸپ وتىر», - دەدٸ شاحماردان بايمانوۆ.
