10 تامىز كٷنٸ 2006 QQ23 استەرويدى جەرگە دەيٸن 0,049 استرونومييالىق بٸرلٸككە (7,3 ميلليون كم) عانا جەتپەي, ساعاتىنا 16 740 كيلومەتر جىلدامدىقپەن ۇشىپ ٶتەدٸ, دەپ حابارلايدى قازاقپارات ناسا رەاكتيۆتٸ قوزعالىستار زەرتحاناسىنىڭ جەر ماڭىنداعى نىسانداردى زەرتتەۋ ورتالىعىنا سٸلتەمە جاساپ.
جەرگە جاقىنداپ كەلە جاتقان استەرويدتىڭ ديامەترٸ - 570 مەتر. بۇل, نيۋ-يوركتەگٸ بەلگٸلٸ ەمپاير-ستەيت-بيلدينگ (443 مەتر) مۇناراسىنىڭ بيٸكتٸگٸنەن دە ٷلكەن. دەگەنمەن, دەل قازٸرگٸ ۋاقىتتا اسپان دەنەسٸ بٸزدٸڭ عالامشارعا ەشقانداي قاۋٸپ تٶندٸرمەيدٸ.
ايتا كەتەيٸك, كٷن جٷيەسٸندە ٷلكەندٸگٸ بٸر كيلومەتردەن اساتىن 900 جەرماڭى نىسانى بار. ياعني ولار كٶلەمٸ مەن سالماعى جاعىنان 2006 QQ23 استەرويدىنان ەلدەقايدا ٷلكەن.
ناسا جەرگە جاقىن ۇشىپ ٶتەتٸن كومەتالار مەن استەرويدتاردىڭ ۇشۋ تراەكتورييالارىنا زەرتتەۋ جۇمىستارىن ولار تٸكەلەي قاۋٸپ تٶندٸرٸپ تۇرعاندىقتان عانا ەمەس, سونداي-اق ول نىسانداردان بولاشاقتا قانداي قاۋٸپ تٶنۋٸ مٷمكٸندٸگٸن انىقتاۋ ٷشٸن ٶتكٸزەدٸ.
جالپى, جىل سايىن ورتا ەسەپپەن 2006 QQ23 استەرويدىنىڭ كٶلەمٸمەن پارا-پار التى عارىش نىسانى جەردٸ ماڭايلاپ ۇشىپ ٶتەدٸ.
