جەر قويناۋىن پايدالانۋ سالاسىندا تاۋارلارداعى جەرگٸلٸكتٸ قامتۋ جٶنٸندەگٸ تالاپتار الىپ تاستالادى. بۇل تۋرالى بٷگٸن ٷكٸمەت وتىرىسىندا قر يندۋسترييا جەنە ينفراقۇرىلىمدىق دامۋ مينيسترٸ بەيبٸت اتامقۇلوۆ ايتتى, دەپ حابارلايدى "ۇلت اقپارات".
«بٷگٸندە ەلٸمٸزدە 994 جەر قويناۋىن پايدالانۋشى تٸركەلدٸ. 2019 جىلدىڭ قورىتىندىسىندا جەر قويناۋىن پايدالانۋشى كەسٸپورىنداردىڭ ساتىپ الۋ كٶلەمٸ 7,7 ترلن تەڭگە بولدى. جەرگٸلٸكتٸ قامتۋ ٷلەسٸ - 45 پايىز. بيىلعى 9 ايدا قاتتى پايدالى قازبالاردى قوسپاعاندا, بۇل كٶرسەتكٸش 3,8 ترلن تەڭگەنٸ قۇرادى. جەرگٸلٸكتٸ قامتۋ ٷلەسٸ - 46,6 پايىز», - دەدٸ مينيستر.
ونىڭ ايتۋىنشا, قازاقستاننىڭ دٷنيەجٷزٸلٸك ساۋدا ۇيىمىنا كٸرۋ شارتتارى بويىنشا 2021 جىلعى 1 قاڭتاردان باستاپ كەسٸپورىندارعا كٶرسەتٸلەتٸن پرەفەرەنتسييالاردى كەزەڭ-كەزەڭمەن الىپ تاستاۋ كٶزدەلگەن.
«جەر قويناۋىن پايدالانۋ سالاسىندا تاۋارلارداعى جەرگٸلٸكتٸ قامتۋ جٶنٸندەگٸ تالاپتار الىپ تاستالادى. بۇل رەتتە, جۇمىستار مەن قىزمەتتەر بويىنشا جەر قويناۋىن پايدالانۋعا ارنالعان كەلٸسٸمدەردەگٸ جەرگٸلٸكتٸ قامتۋ ٷلەسٸ 50 پايىزدان اسپايتىن بولىپ بەلگٸلەنەدٸ», - دەدٸ بەيبٸت اتامقۇلوۆ.
