بٷگٸن ٷرجار اۋدانىنا قاراستى جاربۇلاق ەلدٸمەكەنٸندەگٸ ورتا مەكتەپتە سٶز زەرگەرٸ, تاريحشى-ەتنوگراف زەينوللا سەنٸك اتىنداعى سىنىپتىڭ اشىلۋى ٶتتٸ, دەپ حابارلايدى "ۇلت اقپارات" بەلگٸلٸ اقىن اقبەرەن ەلگەزەكتٸڭ فەيسبۋكتاعى جازباسىنا سٸلتەمە جاساپ.
سالتاناتتى شارانى “زەينوللا سەنٸك اتىنداعى مەدەنيەت قورى” ۇيىمداستىردى.
زامان تالاپتارىنا ساي جاساقتالعان ەدەبيەت كابينەتٸ 3,5 ملن. تەڭگەگە جاساقتالعان.
"سول سىنىپتا بٸلٸم الىپ, ارماندارىن ۇشتايتىن جاسٶسپٸرٸمدەر ٷشٸن قۋاندىق. سونداي مٷمكٸندٸكتەر جاساعان قانات سەنٸك اعامىزعا, قانەكەڭنٸڭ قاسىندا وسىنداي ٷلكەن شارۋالاردى تىڭعىلىقتى ۇيىمداستىرىپ جٷرگەن اقىن سەرٸك قاليەۆ پەن جارقىن سەلەنۇلى مىرزالارعا دەن ريزا بولدىق...
قور بيىل جارتى ميلليونعا جۋىق قارجى جۇمساپ, ٷزدٸك وقۋشىلارعا اتالارىنىڭ اتىنداعى شەكٸرتاقى تاعايىنداپتى. شەكٸرتاقىسىن العان وقۋشىلاردىڭ بال-بۇل جايناعان جٷزدەرٸن كٶرگەن ادام “ە, ەر قالتالى ادامنىڭ قولىنان كەلەتٸن شارۋا عوي, ٶستٸسە بولادى عوي” دەپ ريزا كٶڭٸلمەن ويلانىپ قالار ەدٸ. وسىنداي يگٸ جۇمىستار قازاقتىڭ ٸشٸندە كٶپ بولسىنشى!.." - دەيدٸ قالامگەر ٶز جازباسىندا.
ايتا كەتەيٸك, زەينوللا مٷبەراكۇلى سەنٸك 1935 جىلى قىتايدىڭ تارباعاتاي ايماعىندا دٷنيەگە كەلگەن. پەكين قالاسىنداعى ورتالىق جاستار ينستيتۋتىن بٸتٸرٸپ, ەڭبەك جولىن باسپاگەرلٸكتەن باستاعان. ٷرٸمجٸدەگٸ جاستار باسپاسىندا جاۋاپتى رەداكتور بولىپ قىرىق جىلداي قىزمەت اتقارعان. 1955 جىلدان باستاپ ەدەبي زەرتتەۋ جۇمىستارىن جازا باستاعان. سول ۋاقىتتا قىتايدا جٷرگٸزٸلگەن “مەدەني تٶڭكەرٸستٸڭ” اۋىر سوققىسىنا ۇشىراپ, “حالىق جاۋى” بولىپ, اۋىر كٷندەردٸ دە ٶتكەرگەن.
سوعان قاراماستان, قالامگەردٸڭ عىلىمي ەڭبەكتەرٸنەن, رومان, پوۆەستەرٸنەن قۇرالعان جيىرمادان استام كٸتابى جارىق كٶرگەن. قازاقستاندا “قاراكەرەي قابانباي”, “حاس باتىر قابانباي”, “تۇعىرىل حان”, “دەمەجان باتىر”, حالىق كٷيشٸسٸ قايراقباي”, “باسپاي” اتتى كٸتاپتارى مەن ەڭبەكتەرٸ جارييالانعان.
