جاپونييادا گەنناديي گولوۆكيننٸڭ ٶز شاپانىن مۋراتاعا جاپقانى تالقىلانىپ جاتىر. nikkansports.com سايتى «كٸمگە كٶڭٸلٸڭ تولسا, سوعان سىيلا» دەگەن تاقىرىپپەن ماقالا جارييالادى, دەپ حابارلايدى قازاقپارات.
ماتەريالدا قازاقستاندىق بوكسشىنىڭ جەكپە-جەك بٸتكەن سوڭ جانكٷيەرلەرگە العىس بٸلدٸرگەنٸ جازىلادى. سونداي-اق گولوۆكيننٸڭ ٶز شاپانىن قارسىلاسىنا جابۋ سەبەبٸن بوكسشىنىڭ سٶزٸمەن تٷسٸندٸرەدٸ.
«مۋراتا جٷزٸ جىلى, جىميىپ جٷرەدٸ. وعان دەگەن جاقىندىقتى سەزٸندٸم جەنە مەن ونى قاتتى قۇرمەتتەيمٸن. مەن ونى كەرەمەت چەمپيون دەپ ەسەپتەيمٸن. شاپان – قازاقتىڭ ۇلتتىق كيٸمٸ. ونى ەڭ قۇرمەتتٸ ادامعا جاباتىن دەستٷر بار. سول سەبەپتٸ, ونى مۋراتاعا جاپتىم», - دەگەن گەنناديي گولوۆكين.
ال news.yahoo.co.jp سايتى GGG ٶز شاپانىن تۇڭعىش رەت قارسىلاسىنا سىيلادى دەگەن دەرەك كەلتٸرەدٸ.
«پروموۋتەر توم لەففلەردٸڭ سٶزٸنشە, گولوۆكين بٸرٸنشٸ رەت ٶز شاپانىن كيگٸزٸپ تۇر. ول باتىل قارسىلىق كٶرسەتكەن جاپون باتىرىنا «بۇل مەنٸڭ مۋراتاعا قۇرمەتٸم» دەگەنٸ», - دەپ جازىپتى.
قازاقستاندىق كەسٸپقوي بوكسشى گەنناديي گولوۆكين (41-1-1, 36 كو) جاپونييانىڭ سايتاما قالاسىندا ٶتكەن كەسٸپقوي بوكس كەشٸندە شارشى الاڭ يەسٸ ريوتا مۋراتانى (16-2, 13 كو) 9 راۋندتا نوكاۋتقا جٸبەرگەن ەدٸ.
