فوتو: sarbaz.kz
قازاقستاندىق بوكسشى, ورتا سالماقتا IBF/WBO نۇسقالارى بويىنشا ەلەم چەمپيونى جەنٸبەك ەلٸمحانۇلى (17-0, 12 كو) The Ring جۋرنالىنىڭ بەدەلدٸ رەيتينگٸندەگٸ ورنىنان ايىرىلدى, دەپ جازادى Ult.kz.
ەلٸمحانۇلى ورتا سالماق رەيتينگٸندە بٸرٸنشٸ ورىندا تۇرعان ەدٸ. الايدا دوپينگ-تەستتٸڭ وڭ نەتيجە بەرۋٸنە بايلانىستى بولعان وقيعادان كەيٸن «قازاق ستيلٸ» توپ-10 قاتارىنان شىعارىلدى. بٸرٸنشٸ ورىنعا WBC تۇجىرىمى بويىنشا چەمپيون اتانعان دومينيكاندىق كارلوس ادامەس كٶتەرٸلدٸ. ال ٷزدٸك ٷشتٸكتٸ كۋبالىق يوەنليس ەرناندەس پەن ەريسلاندي لارا تٷيٸندەپ تۇر.
ەسكە سالايىق, 7 جەلتوقساندا ەلٸمحانۇلى مەن لارا ورتا سالماقتاعى ەلەم چەمپيونىنىڭ ٷش بٸردەي تيتۋلى ٷشٸن جەكپە-جەككە شىعۋى تيٸس بولعان. الايدا جەكپە-جەككە بٸرنەشە كٷن قالعاندا جەنٸبەكتٸڭ دوپينگ-سىناماسىنان تىيىم سالىنعان مەلدونيي پرەپاراتى انىقتالدى. سونىڭ سالدارىنان كەزدەسۋ ٶتپەي قالدى.
نەتيجەسٸندە لارا ەلٸمحانۇلىنىڭ ورنىنا ۆەنەسۋەلادان سوڭعى سەتتە شاقىرىلعان يوحان گونسالەسپەن جۇدىرىقتاسىپ, تٶرەشٸلەردٸڭ بٸراۋىزدى شەشٸمٸمەن جەڭٸسكە جەتتٸ. ال جەنٸبەك ەلٸمحانۇلىنىڭ ٸسٸ بويىنشا قازٸرگٸ ۋاقىتتا ٸشكٸ تەرگەۋ جٷرگٸزٸلٸپ جاتىر, «B» سىناماسىن اشۋ قاڭتار ايىنا جوسپارلانعان.
