فوتو: قر وام
2025–2026 وقۋ جىلىندا 300 مىڭنان استام وقۋشى ورنىنا ەسەپتەلگەن 200-دەن استام جاڭا مەكتەپ سالۋ جوسپارلانىپ وتىر. سونىڭ ٸشٸندە 206 مىڭ وقۋشى ورنىنا ارنالعان 112 مەكتەپ «كەلەشەك مەكتەپتەرٸ» ۇلتتىق جوباسى اياسىندا پايدالانۋعا بەرٸلەدٸ. جاڭا مەكتەپتەردٸڭ جارتىسىنا جۋىعى اۋىلداردا ورنالاسادى, دەپ حابارلايدى Ult.kz.
بۇل جوبالاردى جٷزەگە اسىرۋ قالا مەن اۋىل مەكتەپتەرٸ اراسىنداعى الشاقتىقتى ازايتۋعا, 15 اپاتتى مەكتەپ مەسەلەسٸن شەشۋگە, ٷش اۋىسىمدى وقىتۋدى جەنە 150 مىڭعا جۋىق وقۋشى ورنى تاپشىلىعىن جويۋعا مٷمكٸندٸك بەرەدٸ.
قوسىمشا 1000 اۋىل مەكتەبٸندە جٶندەۋ جۇمىستارى جٷرگٸزٸلٸپ, جيھاز جاڭارتىلادى, كٸتاپحانالار, اسحانالار مەن قاۋٸپسٸزدٸك جٷيەلەرٸ جابدىقتالادى. سونىمەن قاتار حيمييا, فيزيكا, بيولوگييا, روبوتوتەحنيكا جەنە STEM باعىتتارى بويىنشا 1000 زاماناۋي پەندٸك كابينەت ساتىپ الىنۋدا.
مەملەكەت باسشىسىنىڭ تاپسىرماسىنا سەيكەس, بٸرىڭعاي زاماناۋي مەكتەپ ينفراقۇرىلىمى فورماتىنا كٶشۋ ٷشٸن 2029 جىلعا دەيٸن 1231 مەكتەپتٸ جاڭعىرتۋ باعدارلاماسى باستالادى. بيىل 248 مەكتەپ رەنوۆاتسييادان ٶتەدٸ. بۇل مەكتەپتەردە شاتىرلار اۋىستىرىلىپ, قاسبەتتەر مەن تەرەزەلەر جاڭارتىلادى, ينجەنەرلٸك جەلٸلەرگە كٷردەلٸ جٶندەۋ جٷرگٸزٸلٸپ, اۋماق كٶگالداندىرىلىپ, اباتتاندىرىلادى.
ەسكە سالا كەتەيٸك, 2019 جىلدان باستاپ قازاقستاندا بٸلٸم بەرۋ سالاسىندا اۋقىمدى ينفراقۇرىلىمدىق جوبالار جٷزەگە اسىرىلىپ كەلەدٸ. وسى ۋاقىت ٸشٸندە 1200 جاڭا مەكتەپ اشىلىپ, 1 ميلليوننان استام وقۋشى ورنى قامتاماسىز ەتٸلدٸ. بۇل شارالار مەكتەپتەردٸڭ شامادان تىس جٷكتەمەسٸن جەنە ٷش اۋىسىمدى وقىتۋدى ايتارلىقتاي ازايتۋعا مٷمكٸندٸك بەردٸ. قازٸرگٸ تاڭدا 3000 مەكتەپ بٸر اۋىسىممەن جۇمىس ٸستەيدٸ.
