جامبىل وبلىسىنداعى ەسكەري بٶلٸمدە 10-نان استام جارىلىس بولعان. بۇل تۋرالى قر قورعانىس مينيسترٸ نۇرلان ەرمەكباەۆ مەلٸم ەتتٸ, دەپ حابارلايدى قازاقپارات.
«26 تامىز كٷنٸ ساعات 18:45-تە وڭتٷستٸك ٶڭٸرلٸك قولباسشىلىعىنىڭ ينجەنەرلٸك وق-دەرٸگەر بازاسىندا قويمالاردىڭ بٸرٸنەن ٶرت شىقتى. ٶرتتٸ سٶندٸرۋگە ەسكەري بٶلٸمنٸڭ قۇرامىندا 3 توپ بار ٶرت سٶندٸرۋ كومانداسى شۇعىل كٸرٸسكەن. ەسكەري بٶلٸم بويىنشا كەزەكشٸ بۇل جايىندا وڭتٷستٸك ٶڭٸرلٸك قولباسشىلىق قولباسشىسى جەدەل كەزەكشٸلٸك باسقارماسىنا حابارلاعان», - دەدٸ مينيستر جامبىل ٶڭٸرلٸك كوممۋنيكاتسييالار قىزمەتٸندەگٸ باسپاسٶز مەسليحاتى بارىسىندا.
ونىڭ اتاپ ٶتۋٸنشە, باستاپقى كەزەڭدە ٶرتتٸ سٶندٸرۋگە 500 ادام جۇمىلدىرىلعان. كەيٸن ولاردىڭ سانى 1 مىڭ ادامعا, ٶرت سٶندٸرۋ ماشينالارىنىڭ سانى 24-كە جەتكٸزٸلگەن.
«قابىلدانعان ٸس-شارالارعا قاراماستان ٶرت شىققاننان كەيٸن 1 ساعاتتان سوڭ العاشقى جارىلىس ورىن الدى. جالپى قۋاتى شاعىن 10-نان استام جارىلىس بولعان. اتالعا بازادا ينجەنەرلٸك وق-دەرٸگەر ساقتالادى. ولاردىڭ بٸر بٶلٸگٸ وسىدان ەكٸ جىل بۇرىن ارىس قالاسىنان جەتكٸزٸلگەن ەدٸ», - دەدٸ نۇرلان ەرمەكباەۆ.
