ٸشكٸ ٸستەر مينيسترلٸگٸ مەملەكەتتٸك شەكارا ارقىلى جانار-جاعارماي ماتەريالدارىن زاڭسىز ەكەتۋگە قارسى باقىلاۋدى كٷشەيتتٸ. جىل باسىنان بەرٸ كٶلٸكتەرگە قوسىمشا وتىن باگىن زاڭسىز ورناتۋعا قاتىستى 255 قۇقىق بۇزۋشىلىق انىقتالعان, دەپ حابارلايدى ult.kz.
ۆەدومستۆو مەلٸمەتٸنشە, قازٸرگٸ ۋاقىتتا مەملەكەتتٸك شەكاراداعى اۆتوموبيل ٶتكٸزۋ بەكەتتەرٸنٸڭ ماڭىندا 59 پوليتسييا بەكەتٸ جۇمىس ٸستەپ تۇر. ولاردىڭ نەگٸزگٸ مٸندەتٸ – جانار-جاعارمايدىڭ زاڭسىز تاسىمالدانۋىنا جول بەرمەۋ.
پوليتسەيلەردٸڭ ايتۋىنشا, انىقتالعان بارلىق قۇقىق بۇزۋشى قازاقستان رەسپۋبليكاسىنىڭ ەكٸمشٸلٸك قۇقىق بۇزۋشىلىق تۋرالى كودەكسٸنٸڭ 590-بابىنىڭ 7-بٶلٸگٸ بويىنشا ەكٸمشٸلٸك جاۋاپكەرشٸلٸككە تارتىلعان.
جاۋاپقا تارتىلعانداردىڭ 195-ٸ – شەتەل ازاماتتارى, ال 60-ى – قازاقستان ازاماتتارى. زاڭسىز ورناتىلعان قوسىمشا وتىن باكتارى الىنىپ, كٶلٸكتەر يەلەرٸنە قايتارىلدى.
ايتا كەتەيٸك, كٶلٸك قۇرالىنا رۇقساتسىز ٶزگەرٸس ەنگٸزٸپ, قوسىمشا وتىن باگىن ورناتقانى ٷشٸن 15 ايلىق ەسەپتٸك كٶرسەتكٸش (64 875 تەڭگە) كٶلەمٸندە ايىپپۇل قاراستىرىلعان.
