ۆيتسە-پرەمەر توعجانوۆ بجزق-نىڭ جەتكٸلٸكتٸ شەگٸ تۋرالى: بيلٸك ٷنسٸز قالعان جوق

پرەمەر-مينيستردٸڭ ورىنباسارى ەرالى توعجانوۆ زەينەتاقى جيناعىنىڭ جەتكٸلٸكتٸ شەگٸ ۇلعايۋىنا قاتىستى تٷسٸنٸكتەمە بەردٸ, دەپ حابارلايدى Sputnik.

سەيسەنبٸدە جۋرناليستەر شەنەۋنٸكتەن شەكتٸ جوعارىلاتۋ تۋرالى اقپارات نەلٸكتەن 2021 جىلدىڭ اياقتالۋىنا بٸر اي قالعاندا بەلگٸلٸ بولعانىن سۇرادى.

"بٸرٸنشٸدەن, ٷكٸمەت ٷنسٸز قالعان جوق. ەكٸنشٸدەن, بۇل شەشٸم 2021 جىلدىڭ 6 قاڭتارىندا قابىلداندى. ادامدار بٸلەدٸ, حالىق ول تۋرالى جاقسى بٸلدٸ. ەگەر جىل سوڭىندا عانا بەلگٸلٸ بولسا, 606 مىڭ ادام بۇل مٷمكٸندٸكتٸ پايدالانباس ەدٸ. ازاماتتار باسپانا مەسەلەسٸن شەشۋگە, ەمدەلۋگە 2,2 تريلليون تەڭگە الدى. بۇل قوماقتى سوما", - دەدٸ توعجانوۆ.

قازاقستاندا 3 جەلتوقساندا 2022 جىلى جيناقتالعان زەينەتاقى قاراجاتىن مەرزٸمٸنەن بۇرىن الۋدىڭ جەتكٸلٸكتٸ شەگٸ كٷرت ٶسەتٸنٸ بەلگٸلٸ بولدى. زەينەتاقى جيناعىن پايدالانۋ ٷشٸن جەتكٸلٸكتٸ شەك بولۋى قاجەت: 21 جاستا – 3,2 ميلليون تەڭگە, 22 جاستا – 3,3 ميلليون تەڭگە, 30 جاستا – 4,4 ميلليون تەڭگە, 40 جاستا – 5,8 ميلليون تەڭگە, 50 جاستا – 7,4 ميلليون تەڭگە.

باستاپقىدا جەتكٸلٸكتٸ شەكتٸ 2022 جىلدىڭ 1 قاڭتارىنان باستاپ كٶتەرۋ جوسپارلانعان بولاتىن, بٸراق نارازىلىق تولقىنىنان كەيٸن پرەزيدەنت ونى 2022 جىلدىڭ 1 سەۋٸرٸنە دەيٸن كەيٸنگە شەگەرۋ تۋرالى شەشٸم قابىلدادى.