بٷگٸن يوردانييانىڭ اممان قالاسىندا ٶتٸپ جاتقان بوكستان وليمپياداعا ٸرٸكتەۋ تۋرنيرٸندە ۆاسيليي لەۆيت جەرگٸلٸكتٸ بوكسشىنى ۇتىپ, فينالعا جولداما الدى, دەپ حابارلايدى "ۇلت اقپارات".
لەۆيت - ەرلەر اراسىندا 91 كەلٸ سالماقتا ەل نامىسىن ابىرويمەن قورعاپ جٷرگەن بوكسشىلارىمىزدىڭ بٸرٸ. ول بٷگٸن وليمپيادالىق ٸرٸكتەۋ تۋرنيرٸنٸڭ جارتىلاي فينالىندا شارشى الاڭ قوجايىنى حۋسەين يشايشپەن جۇدىرىقتاسىپ, اسا تارتىستى جەكپە-جەك قورىتىندىسى بويىنشا تٶرەشٸلەردٸڭ شەشٸمٸمەن جەڭٸسكە جەتتٸ.
بۇل - عالىمبەك كەنجەباەۆ باپتايتىن بوكسشىلار اراسىنان وليمپيادالىق ٸرٸكتەۋ تۋرنيرٸنٸڭ فينالىنا شىققان ەكٸنشٸ بوكسشى.
ەستەرٸڭٸزگە سالا كەتەيٸك, وسىعان دەيٸن زاكير سافيۋلليننٸڭ قازاق بوكسشىلارى اراسىندا بٸرٸنشٸ بولىپ وليمپيادالىق ٸرٸكتەۋ تۋرنيرٸنٸڭ فينالىنا شىققانىن جازعان بولاتىنبىز. سونداي-اق, ابىلايحان جٷسٸپوۆ اتالعان تۋرنيردٸڭ جارتىلاي فينالىندا ۇتىلىپ, قولا مەدالدٸ قاناعات تۇتتى.
وسىمەن كٷندٸزگٸ سەسسييادا قازاق بوكسشىلارى جارىستى اياقتادى. ەندٸ كەشكٸ سەسسييادا 5 بوكسشىمىز شارشى الاڭعا شىعادى.
كەشكٸ سەسسييا نۇر-سۇلتان ۋاقىتىمەن ساعات 21:00-دە باستالادى.
كەشكٸ سەسسييادا مىنا بوكسشىلار سىنعا تٷسەدٸ:
ەيەلدەر
75 كەلٸ نادەجدا ريابەتس (قازاقستان) - كەيتلين پاركەر (اۆسترالييا)
ەرلەر
57 كەلٸ سەرٸك تەمٸرجانوۆ (قازاقستان) - ميرازيزبەك ميرزاحاليلوۆ (ٶزبەكستان)
75 كەلٸ ەبٸلحان امانقۇل (قازاقستان) - تاڭاتحان توقتاربەك (قىتاي)
81 كەلٸ بەكزات نۇردەۋلەتوۆ (قازاقستان) - وداي الحينداۆي (يوردانييا)
+91 كەلٸ قامشىبەك قوڭقاباەۆ (قازاقستان) - حۋني ەدٸلەت (اۆسترالييا).
