اقمولا وبلىسىندا ٷيلەنۋ تويىندا جانجال شىعىپ, 21 جاستاعى جٸگٸت پىشاق جاراقاتىمەن اۋرۋحاناعا تٷستٸ, دەپ حابارلايدى قازاقپارات.
وبلىستىق پوليتسييا دەپارتامەنتٸ باسپاسٶز قىزمەتٸنٸڭ مەلٸمەتٸنشە, بيىلعى جىلعى 22 قاراشادا جارقايىڭ اۋداندىق پب كەزەكشٸ بٶلٸمٸنە 57 جاستاعى جەرگٸلٸكتٸ تۇرعىن حابارلاسىپ, بٸرسۋات اۋىلىندا پىشاق جاراقاتىن العان 21 جاستاعى ۇلىنا كٶمەككە جەدەل جەردەم قىزمەتٸن جٸبەرۋدٸ سۇراعان.
«وقيعا ورنىنا جارقايىڭ اۋدانىنىڭ پب كەزەكشٸ جەدەل-تەرگەۋ توبى دەرەۋ جەتتٸ. انىقتالعانداي, 2021جىلدىڭ 21 قاراشاسىندا جەرگٸلٸكتٸ جشس اسحاناسىندا ٷيلەنۋ تويى ٶتكەن. تويدا قوناقتار اراسىندا جانجال تۋىنداعان. سالدارىنان بۇرىن سوتتى بولعان نۇر-سۇلتان قالاسىنىڭ 30 جاستاعى تۇرعىنى بٸرسۋات اۋىلىنىڭ 21 جاستاعى تۇرعىنىنا ٸش تۇسىنان پىشاق سۇعىپ العان. زارداپ شەگۋشٸ «سول جاقتان ٸش قۋىسىنا پىشاق جاراقاتىن سالۋ, ٸشكٸ قان كەتۋ» دياگنوزىمەن جارقايىڭ اۋداندىق اۋرۋحاناسىنا جاتقىزىلدى», - دەدٸ ۆەدومستۆونىڭ باسپاسٶز قىزمەتٸ قازاقپارات تٸلشٸسٸنٸڭ ساۋالىنا.
ۆەدومستۆودان اتاپ ٶتكەندەي, بۇل وقيعاعا جارقايىڭ اۋدانىنىڭ پب سوتقا دەيٸنگٸ تەرگەۋدٸڭ بٸرىڭعاي تٸزٸلٸمٸنە 106-شٸ بابىنىڭ 1-شٸ بٶلٸگٸ بويىنشا №211154031000144 بولىپ تٸركەلدٸ.
«كٷدٸكتٸ قىلمىستىق كودەكستٸڭ 128-شٸ بابى بويىنشا جارقايىڭ اۋداندىق پوليتسييا بٶلٸمٸنٸڭ ۋاقىتشا ۇستاۋ وقشاۋلاعىشىنا قامالدى. قازٸرگٸ ۋاقىتتا تەرگەۋ شارالارى جٷرگٸزٸلۋدە, ولاردىڭ سوڭىندا تٷپكٸلٸكتٸ پروتسەسسۋالدىق شەشٸم قابىلدانادى», - دەپ تولىقتىردى ۆەدومستۆودان.
