قاڭتار وقيعاسى كەزٸندە ەۋەجايداعى ۇشاقتىڭ بٸرٸندە قالىپ قويعان ۇشقىش سول كٷنٸ باستان كەشكەن وقيعا تۋرالى العاش رەت سۇحبات بەردٸ. الماس بايعوجيننٸڭ ايتۋىنشا, ٸشكە ەنتەلەگەندەر قازاق, ورىس, تٸپتٸ اعىلشىن تٸلٸندە سٶيلەگەن, - دەپ حابارلايدى Tengrinews.kz تٸلشٸسٸ كتك تەلەارناسىنا سٸلتەمە جاساپ.
بەسٸنشٸ قاڭتار. الماتى ەۋەجايى. بٸرنەشە ساعاتتان سوڭ ۇشاققا شابۋىل بولادى دەگەن وي ول سەتتە الماس بايعوجيننٸڭ قاپەرٸنە كەلمەگەن. تەرمينالدى توناپ, تۇراقتاعى كٶلٸكتەردٸ ايداپ, ودان سوڭ ٶزٸنە بەت العان توپتى كٶرگەندە ٸشتەن ەسٸكتٸ تارس جاۋىپ, تىم-تىرىس قاتقان دا قالعان.
"جينالعان توپتىڭ بٸرٸ ۇشاققا كەلٸپ اينالاسىن قارايلادى. بٸراق ەشنەرسە ٸستەمەدٸ. 78 جٸگٸت بولاتىن. اراعا جارتى ساعات سالىپ, بٸر كەزدە 15 شاقتى ادام كەلدٸ. قولىندا تەمٸر, بالتا, تاعى دا باسقا زاتتار بولدى. ەسٸكتٸ بۇزىپ كٸرگٸسٸ كەلدٸ. بٸر قىزىعى, ولار ەسٸكتٸڭ سىرتتان قالاي اشىلاتىنىن بٸلگەندەي ەرەكەت ەتتٸ. ٶيتكەنٸ قۇرىلىمى كٷردەلٸ بولعاندىقتان, ونى قالاي اشۋ كەرەگٸن ەكٸنٸڭ بٸرٸ بٸلمەيدٸ", - دەيدٸ ۇشقىش الماس بايعوجي.
