11 قىركٷيەكتە ۋكراينا شىعىسىنىڭ ەدەۋٸر بٶلٸگٸ جارىقسىز قالدى. كيەۆ رەسەي ەسكەرٸنٸڭ ۋكراينا ەنەرگەتيكا ينفراقۇرىلىمدارىنا شابۋىلداعانىن, جارىقتىڭ سونىڭ سالدارىنان ٶشكەنٸن مەلٸمدەدٸ, دەپ حابارلايدى ازاتتىق.
جارىق پەن سۋعا بايلانىستى قيىندىقتار حاركوۆ, سۋمى, پولتاۆا, زاپوروجە جەنە دنەپروپەتروۆسك وبلىسىندا بايقالعان.
ۋكراينا پرەزيدەنتٸ ۆلاديمير زەلەنسكيي رەسەيدٸ "ازاماتتىق ينفراقۇرىلىمدارعا شابۋىلداپ وتىر" دەپ ايىپتادى.
ال, حاركوۆ مەرٸ يگور تەرەحوۆ رەسەيدٸڭ قالاداعى جىلۋ ەلەكتر ستانتسيياسىن اتقىلاعانىن ايتتى. بۇل ستانتسييا ۋكراينادا اۋماعى بويىنشا ەكٸنشٸ ورىن الادى.
حاركوۆ وبلىسىنىڭ گۋبەرناتورى ولەگ سينەگۋبوۆ بٸرنەشە ەلدٸمەكەندە جارىق پەن سۋ توقتاعانىن مەلٸمدەدٸ. سۋمى وبلىسىنىڭ باسشىسى جارىق پەن سۋدىڭ ٶشۋٸ كەمٸ 125 ەلدٸمەكەنگە زييان تيگٸزگەنٸن ايتتى.
جارىق پەن سۋدىڭ جاپپاي ٶشۋٸ ۋكراينانىڭ شىعىستاعى وككۋپاتسييالانعان اۋماقتاردا رەسەيگە قارسى قارىمتا شابۋىلىن ٷدەتۋٸنە تۇسپا-تۇس كەلدٸ. وسى ايدا باستالعان قارىمتا شابۋىلدىڭ نەتيجەسٸندە ۋكراينا شىعىسىندا رەسەي باسىپ العان بٸرنەشە قالا مەن ەلدٸمەكەندٸ ازات ەتٸپ ٷلگەردٸ.
