ۋكراينا سىرتقى ٸستەر مينيسترلٸگٸ بىلتىر قاراشا ايىندا قارا تەڭٸزدە باسىپ الىنعان ۋكراينا ەسكەري تەڭٸز كٷشتەرٸنٸڭ كەمەلەرٸن قايتارۋدى تالاپ ەتٸپ, رەسەيگە نوتا جولدادى.
بۇل اقپاراتتى ۋكراينا سىرتقى ٸستەر مينيسترلٸگٸنٸڭ باسشىسى ۆاديم پريستايكو كيەۆتە ەستونييا سىرتقى ٸستەر مينيسترٸ ۋرماس رەينسالمەن بٸرگە باسپاسٶز كونفەرەنتسيياسىن ٶتكٸزگەن كەزدە تاراتتى.
ۋكراينا جولداعان نوتادا كەمەلەردٸڭ كوورديناتتارى مەن قايتارىلاتىن ۋاقىتىن كٶرسەتۋ تالاپ ەتٸلگەن.
ۋكراينا سىرتقى ٸستەر مينيسترٸنٸڭ ورىنباسارى ەلەنا زەركال فەيسبۋك پاراقشاسىندا ۋكراينا رەسەيگە بۇرىن دا وسىلاي جەتٸ رەت تالاپ قويعانىمەن جاۋاپ الماعانىن جازدى.
بٸرٸككەن ۇلتتار ۇيىمىنىڭ تەڭٸز قۇقىعى بويىنشا حالىقارالىق تريبۋنالى بيىل مامىردا رەسەيدٸ ۋكراينا كەمەلەرٸن قايتارۋعا مٸندەتتەيتٸن قاۋلى العان. الايدا مەسكەۋ بۇل جاعدايدا تريبۋنالدىڭ زاڭدىق كٷشٸ جوق دەپ ەسەپتەيتٸنٸن بٸلدٸرگەن. مەسكەۋ ۋكراينا كەمەلەرٸ رەسەيدٸڭ تەڭٸزدەگٸ شەكاراسىن بۇزدى دەپ سانايدى.
2018 جىلى 25 قاراشادا رەسەي شەكاراشىلارى ۋكراينانىڭ كەرچ بۇعازى ارقىلى ازوۆ تەڭٸزٸنە ٶتپەك بولعان "بەرديانسك" جەنە "نيكوپول" اتتى كاتەرلەرٸ مەن "يانى كاپۋ" بۋكسيرٸن توقتاتقان ەدٸ. كەمەنٸڭ 24 ەسكەري قىزمەتكەرٸ قاماۋعا الىندى. ولار 9 اي مەسكەۋ يزولياتورىندا وتىرىپ, قىركٷيەكتٸڭ باسىندا ۋكراينا مەن رەسەيدٸڭ «35-كە 35» فورمۋلاسىمەن جاسالعان ايىرباس كەزٸندە قايتقان. الايدا ەسكەري كەمەلەر رەسەي قولىندا قالعان.
