F-16 Fighting Falcon. فوتو: military.com
ۋكراينا قورعانىس مينيسترلٸگٸ الەكسەي رەزنيكوۆ رەسەي باسقىنشىلىعىنا پەرمەندٸ قارسىلىق كٶرسەتۋ ٷشٸن ەلگە ەرەكەت ەتۋ راديۋسى قولدا بارىنان دا ۇزاقتاۋ جويعىش پەن ەسكەري ۇشاقتار, زىمىراندار قاجەتٸن ايتتى. مۇنىڭ الدىندا باتىستىڭ بٸرقاتار مەملەكەتٸ كيەۆكە سوعىس تانكٸلەرٸن جەتكٸزۋ تۋرالى شەشٸم شىعارعانى حابارلانعان. بۇل تۋرالى مينيستر سۆس ارناسىنا بەرگەن سۇحباتىندا ايتقان, دەپ جازادى ازاتتىق.
ۇشاق پەن ۇزاق قاشىقتىققا ۇشاتىن زىمىراندار قاجەت ەكەنٸن كەيٸنگٸ كەزدەرٸ ۋكراينا پرەزيدەنتٸ ۆلاديمير زەلەنسكيي دە بٸرنەشە رەت ايتقان.
باتىس ەلدەرٸ العاشىندا ۋكرايناعا ەۋە شابۋىلىنا قارسى قورعانىس قۇرالدارى مەن تانكٸلەردٸ جەتكٸزۋگە قۇلىقسىز بولىپ, كەيٸن ويىن ٶزگەرتكەنٸن اتاپ ٶتكەن رەزنيكوۆ "بٷگٸن بولماسا, ەرتەڭ مٷمكٸندٸك بولادى" دەگەن. مينيستر قارۋ رەسەيدٸڭ حالىقارالىق دەڭگەيدە مويىندالعان اۋماعىنداعى نىساندارعا اتىلمايتىنىن ايتتى.
اقش اقپارات قۇرالدارى كەيٸنگٸ كٷندەرٸ قۇراما شتاتتار مەن ناتو ۋكرايناعا F-16 ەسكەري ۇشاعىن جەتكٸزۋ مەسەلەسٸ تالقىلانىپ جاتقانىن جازعان. بٸراق ونداي شەشٸم شىعارۋدىڭ وڭايعا سوقپايتىنى دا سٶز بولعان. گەرمانييا كانتسلەرٸ ولاف شولتس ٶتكەن جەكسەنبٸدە ۋكرايناعا جويعىش زىمىراندار جٸبەرٸلەتٸنٸن جوققا شىعارعان. يتالييانىڭ دا كيەۆكە شابۋىل قارۋىن بەرمەيتٸنٸ حابارلانعان.
The Wall Street Journal باسىلىمىنىڭ جازۋىنشا, بىلتىر باتىستا كٶپشٸلٸگٸ سوعىستىڭ ۇزاققا جالعاسۋى ۋكرايناعا قولايلى دەسە, قازٸر "ادام مەن تەحنيكانىڭ ٷلكەن رەزەرۆٸ بار كرەمل بۇل سوعىستا جەڭٸسكە جەتۋٸ مٷمكٸن" دەگەن قاۋٸپ جيٸ ايتىلادى.
باسىلىم ۋكرايناعا قۇرىشتى تەحنيكا جەتكٸزۋ ونىڭ سوعىستاعى ديناميكاسىن ٶزگەرتۋگە كٶمەكتەسەدٸ دەپ جازادى.
جەكسەنبٸدە ۇلىبريتانيياعا بٸر توپ ۋكراين ەسكەريٸ كەلٸپ, اعىلشىننىڭ "چەللەندجەر-2" تانكٸلەرٸمەن جۇمىس ٸستەۋدٸ ٷيرەنٸپ جاتىر. بۇل تۋرالى ۇلىبريتانييا قورعانىس مينيسترلٸگٸ حابارلادى. لوندون ۋكرايناعا 14 تانك جەتكٸزۋگە ۋەدە ەتكەن.
ٶتكەن اپتادا اقش ۋكرايناعا "ابرامس 31", گەرمانييا "لەوپراد" تانكٸسٸنٸڭ 14-ٸن جەتكٸزۋگە دايىن ەكەنٸن ايتقان.
