قازاقستاندىق «قايرات» UEFA كونفەرەنتسييا ليگاسى توپتىق كەزەڭٸنە جولداما الدى, دەپ حابارلايدى "ۇلت اقپارات".
بٷگٸن «قايرات» ليۋكسەمبۋرگتٸڭ «فولا» كومانداسىمەن قارىمتا ويىن ٶتكٸزدٸ. ەكٸ كوماندا اراسىنداعى العاشقى كەزدەسۋدە الماتىلىق كلۋب سىرت الاڭدا قارسىلاسىنان 4:1 ەسەبٸمەن باسىم تٷسكەن بولاتىن.
سوندىقتان ليۋكسەمبۋرگتٸك كلۋبتىڭ بٷگٸنگٸ كەزدەسۋدە ەكٸ ويىن بويىنشا تارازى باسىن تەڭەستٸرۋٸ قاجەت ەدٸ.
ويىندى الماتىلىق كلۋب بەلسەندٸ باستادى. نەتيجەسٸندە 12-مينۋتتا «قايرات» شابۋىلشىسى ارتۋر شۋشەناچەۆ مەرگەندٸك تانىتىپ, كومانداسىن العا شىعاردى. ال 28-مينۋتتا ۆاگنەر لاۆ ەسەپتٸ ۇلعايتا تٷستٸ. ويىننىڭ 36-مينۋتتا ارتۋر شۋشەناچەۆ تاعى بٸر مەرتە قانجىعاسىن مايلادى.
بۇدان كەيٸن 43-مينۋتتا «فولا» ساپىنان ميرزا مۋستافيچ ەسەپ ايىرماسىن قىسقارتتى.
بٷگٸنگٸ كەزدەسۋدە «قايرات» قارسىلاسىنان 3:1 ەسەبٸمەن باسىم تٷستٸ. وسىلايشا UEFA كونفەرەنتسييا ليگاسى توپتىق كەزەڭٸنە جولداما الدى
ەسكە سالساق, «قايرات» الدىمەن چەمپيوندار ليگاسى بٸرٸنشٸ ٸرٸكتەۋ ساتىسىندا يزرايلدٸڭ «ماككابي حايفا» كلۋبىنان (1:1, 2:0) باسىم تٷستٸ. ودان كەيٸن سەربييانىڭ «تسرۆەنا زۆەزدا» كلۋبىنا (2:1, 0:5) جول بەرٸپ قويدى.
ەۋروپا ليگاسى ٷشٸنشٸ ٸرٸكتەۋ ساتىسىندا «قايرات» ارمەنييانىڭ «الاشكەرتٸنە» (0:0, 2:3) ەسە جٸبەردٸ.
سونداي-اق, بٷگٸن UEFA كونفەرەنتسييا ليگاسى پلەي-وفف ساتىسىندا قاراعاندىنىڭ «شاحتەرٸ» سىرت الاڭدا يزرايلدٸڭ «ماككابي تەل-اۆيۆ» كلۋبىمەن كەزدەسەدٸ.
ايتا كەتسەك, UEFA كونفەرەنتسييا ليگاسىندا ەلوردالىق «استانا» جەنە قوستانايلىق «توبىل» كوماندالارى سىنعا تٷسكەن ەدٸ. دەگەنمەن ولار ٷشٸنشٸ ٸرٸكتەۋ ساتىسىنان اسا العان جوق.
