UEFA كونفەرەنتسييا ليگاسى پلەي-وفف ساتىسىندا قازاقستاندىق «قايرات» العاشقى ويىنىن ٶتكٸزدٸ, دەپ حابارلايدى "ۇلت اقپارات".
الماتىلىق كلۋب پلەي-وفف ساتىسىندا سىرت الاڭدا ليۋكسەمبۋرگتٸڭ «فولا» كومانداسىمەن كەزدەستٸ.
ويىننىڭ العاشقى كەزەڭٸندە ەكٸ كوماندانىڭ دا گول سوعاتىن بٸرنەشە مٷمكٸندٸگٸ بولعان ەدٸ. دەسە دە فۋتبولشىلار قاقپانى دەل كٶزدەي العان جوق.
كەزدەسۋدٸڭ 19-مينۋتىندا الاڭ يەلەرٸ قاتارىنان ميرزا مۋستافيچ مەرگەندٸك تانىتقان ەدٸ. بۇدان كەيٸن الماتىلىق كلۋب قاتارىنان ٷش گول سوعىپ كەتتٸ. الدىمەن 28-مينۋتتا ارتۋر شۋشەناچەۆ تارازى باسىن تەڭەستٸردٸ. ودان كەيٸن ۆاگنەر لاۆ 37, ريكاردۋ الۆەش 43-مينۋتتاردا گول سوعىپ, ەسەپتٸ ٷستەمەلەي تٷستٸ. ال 70-مينۋتتا ۆاگنەر لاۆ پەنالتيدەن مٷلت كەتكەن جوق.
وسىلايشا «قايرات» قارسىلاسىنان 4:1 ەسەبٸمەن باسىم تٷستٸ.
ەكٸ كوماندانىڭ قارىمتا كەزدەسۋٸ 26 تامىزدا الماتى قالاسىندا ٶتكٸزٸلەدٸ.
ايتا كەتەيٸك, «قايرات» الدىمەن چەمپيوندار ليگاسى بٸرٸنشٸ ٸرٸكتەۋ ساتىسىندا يزرايلدٸڭ «ماككابي حايفا» كلۋبىنان (1:1, 2:0) باسىم تٷستٸ. ودان كەيٸن سەربييانىڭ «تسرۆەنا زۆەزدا» كلۋبىنا (2:1, 0:5) جول بەرٸپ قويدى.
ەۋروپا ليگاسى ٷشٸنشٸ ٸرٸكتەۋ ساتىسىندا «قايرات» ارمەنييانىڭ «الاشكەرتٸنە» (0:0, 2:3) ەسە جٸبەردٸ.
