فوتو: Gov.kz.
تٷركٸستان وبلىسىندا ٶزٸندٸك كٸرٸس كٶزدەرٸن ارتىرۋ, «كٶلەڭكەلٸ ەكونوميكامەن» كٷرەس, قوسىمشا كٸرٸس كٶزدەرٸن انىقتاۋ جۇمىستارى نەتيجەسٸندە ٶزٸندٸك كٸرٸستەر مەن سالىقتىق تٷسٸمدەر كٶلەمٸ ۇلعايدى. اتالعان سالاداعى مەسەلەلەر وبلىس ەكٸمدٸگٸندە تالقىلاندى. ٶڭٸر باسشىسى دارحان ساتىبالدى بۇل باعىتتاعى جۇمىس قارقىنىن ارتتىرۋدى تاپسىردى, دەپ حابارلايدى «ۇلت اقپارات».
– بٸرٸنشٸ كەزەكتە ٶزٸندٸك كٸرٸس كٶزدەرٸن ارتتىرۋ ماڭىزدى. زاۋىتتار, ٶندٸرٸس ورىندارىن اشۋ, ينۆەستيتسييا تارتۋ جۇمىسىن جانداندىرۋ كەرەك. اۋدان, قالا ەكٸمدەرٸ مەن باسقارما باسشىلارى وسى باعىتتاعى جۇمىستى كٷشەيتسٸن. ەكٸنشٸدەن, سالىق ورگاندارىنا تٸركەلمەي جٷرگەن كەسٸپكەرلەردٸ انىقتاپ, زاڭ شەڭبەرٸندە تٸركەۋ شارت. بۇل رەتتە جاۋاپتى دەپارتامەنت پەن مەكەمەلەردٸڭ جٷيەلٸ ەرٸ تاباندى جۇمىسى قاجەت, – دەدٸ دارحان ساتىبالدى.
تٷركٸستان وبلىسى بويىنشا مەملەكەتتٸك كٸرٸستەر دەپارتامەنتٸنٸڭ باسشىسى ماقسات نۇراحاەۆتىڭ ايتۋىنشا, تٷركٸستان وبلىسى بويىنشا جەرگٸلٸكتٸ بيۋدجەتتٸڭ سالىقتىق تٷسٸمدەردٸڭ بيىلعا بەكٸتٸلگەن جوسپارى – 162 ملرد. تەڭگە. ال 15 قاراشادا ناقتى تٷسكەنٸ – 150,6 ملرد. تەڭگە. جىلدىق جوسپاردىڭ ورىندالۋى 92,9%-دى قۇراپ, 122,5% نەمەسە 27,6 ملرد. تەڭگەگە ٶسكەن. سالىقتىق تٷسٸمدەرگە تالداۋ جٷرگٸزۋ نەتيجەسٸندە 15 قاراشاداعى ناقتى تٷسٸم سوماسى 150,6 ملرد. تەڭگەنٸ قۇرادى نەمەسە 2023 جىلدىڭ ۇقساس كەزەڭٸمەن سالىستىرعاندا 27,6 ملرد. تەڭگەگە ٶسٸپ وتىر.
ايماقتا كورپوراتيۆتٸك تابىس سالىعى بويىنشا 15.11.2024 جىلعا بەكٸتٸلگەن جوسپار 14,6 ملرد. تەڭگە بولسا, ناقتى تٷسٸم 15,4 ملرد. تەڭگەنٸ قۇراپ, جوسپار 105,3% پايىزعا ورىندالدى. ال جەكە تابىس سالىعى بويىنشا جىلعا بەكٸتٸلگەن جوسپار 56,3 ملرد. تەڭگە بولسا, ناقتى تٷسٸم 51,6 ملرد. تەڭگەنٸ قۇراپ, جوساپار 91,6% پايىزعا ورىندالدى. ٶتكەن جىلدىڭ تيٸستٸ كەزەڭٸمەن سالىستىرعاندا 7,9 ملرد. تەڭگەگە ارتقان. 2024 جىلعا 11,8 ملرد. تەڭگەنٸ قۇرايتىن قوسىمشا كٸرٸس كٶزدەرٸ بولجامدالىپ, بٷگٸندە 7,2 ملرد. تەڭگە ٶندٸرٸلگەن. جىل سوڭىنا دەيٸن 4,6 ملرد ٶندٸرٸلەدٸ دەپ كٷتٸلۋدە.
