«تۇمار» ۇلتتىق تەلەۆيزييالىق بەيگەسٸن ۇيىمداستىرۋشىلارى 13 ناۋرىزعا جوسپارلانعان سالتاناتتى شارا تەلەۆيزييالىق فورماتتا كٶرەرمەنسٸز ٶتەتٸنٸن مەلٸم ەتتٸ, دەپ حابارلايدى "ۇلت اقپارات".
اتالعان شەشٸم ەلەمدەگٸ كوروناۆيرۋس پاندەميياسىنا بايلانىستى الدىن الۋ شاراسىن ٸسكە اسىرۋ ماقساتىندا قابىلدانعان.
12 ناۋرىز كٷنٸ قر پرەزيدەنتٸ جانىنداعى ورتالىق كوممۋنيكاتسييالار قىزمەتٸندە «قازاقستانداعى كوروناۆيرۋستىق ينفەكتسييا بويىنشا اعىمداعى جاعداي تۋرالى» باسپاسٶز مەسليحاتى ٶتكەن بولاتىن. قر ۆيتسە-پرەمەرٸ ەرالى توعجانوۆتىڭ ايتۋىنشا, ينفەكتسييانىڭ كەلۋٸن بولدىرماۋ ماقساتىندا 13 ناۋرىزدان باستاپ بۇقارالىق شارالار مەرەكەلٸك, سپورتتىق, جاپپاي مەدەني شارالار, كونفەرەنتسييالار, سەمينارلار, كٶرمەلەر ٶتكٸزۋگە تىيىم سالىنادى.
بەيگەنٸڭ جەڭٸمپازدارى www.tvtumar.kz سايتىندا جارييالاناتىن بولادى. سالتاناتتى ماراپاتتاۋ روەسٸمٸنٸڭ تەلەۆيزييالىق نۇسقاسى 15 ناۋرىزدا «حابار» تەلەارناسىنان كٶرسەتٸلەدٸ.
