اقش قورعانىس مينيسترٸ مارك ەسپەر "يراكتا قىلمىس جاسادى" دەپ ايىپتالعان "تەڭٸز مىسىقتارى" ەليتالىق بٶلٸمٸ اعا سەرجانتىنىڭ ٸسٸ بويىنشا پرەزيدەنت دونالد ترامپپەن كەلٸسپەگەنٸ ٷشٸن ەسكەري تەڭٸز ۆەدومستۆوسىنىڭ باسشىسى ريچارد سپەنسەردٸڭ سەنٸمنەن ايىرىلعانىن مەلٸمدەدٸ.
"وسىدان كەيٸن سپەنسەر ورنىنان كەتتٸ" دەپ حابارلادى پەنتاگون ٶكٸلٸ.
ارناۋلى قىزمەت ساربازى گاللاحەر يراكتاعى "يسلام مەملەكەتٸ" تەررور توبىنىڭ تۇتقىنعا تٷسكەن مٷشەسٸن ٶلتٸردٸ دەگەن كٷدٸككە ٸلٸنگەن. گاللاحەر تۇتقىن دەنەسٸنٸڭ جانىندا سۋرەتكە تٷسكەن. ارنايى قىزمەتتٸڭ بٸرنەشە ساربازى گاللاحەرگە قارسى كۋەلٸك ەتكەن, ولار گاللاحەر بەيبٸت ادامدارعا وق اتقانىن, وعان نارازى سەرٸكتەرٸنە قوقان-لوقى جاساعانىن ايتقان. وقيعا 2017 جىلى بولعان. اقش ەسكري سوتى گاللاحەردٸ اقتاعانىمەن, ٶلگەن ادامنىڭ دەنەسٸن كٶرسەتٸپ سۋرەتكە تٷسكەنٸنە ايىپتى دەپ ساناپ, اقش قارۋلى كٷشتەرٸنٸڭ ابىرويىنا نۇقسان كەلتٸرەتٸن ەرەكەتٸ ٷشٸن ەسكەري دەرەجەسٸ تٶمەندەتٸلگەن.
پرەزيدەنت ترامپ بۇل شەشٸمنٸڭ كٷشٸن جويىپ, ەسكەري قىلمىس جاسادى دەگەن كٷدٸككە ٸلٸنگەن تاعى ەكٸ ادامعا راقىمشىلىق جاساعان. وسىدان كەيٸن ترامپ "گاللاحەر وتستاۆكاعا كەتكەننەن كەيٸن" ارنايى قىزمەتكەرگە تيەسٸلٸ بەلگٸلەردٸ ساقتاپ قالۋى تيٸستٸگٸن جازعان.
سپەنسەر پرەزيدەنتتٸڭ پٸكٸرٸمەن كەلٸسپەدٸ. قاۋٸپسٸزدٸك مەسەلەسٸ بويىنشا كانادادا ٶتكەن حالىقارالىق فورۋمدا 23 قاراشادا ول تۆيتتەردەگٸ حابارلامانى "رەسمي بۇيرىق" دەپ سانامايتىنىن ايتقان. The Washington Post مينيستر گاللاحەردٸ وتستاۆكاعا اتاقتارىن ساقتاي وتىرىپ جٸبەرۋ ارقىلى بەيرەسمي تٷردە اق ٷيدٸ ٸسكە ارالاسپاۋعا شاقىرىپ وتىر دەپ سانايدى.
سپەنسەر وتستاۆكاعا جٸبەرۋ تۋرالى ٶتٸنٸشٸندە باس قولباسشىدان, ياعني ترامپتان ەسكەري تەرتٸپ جٶنٸندە تٷسٸنٸستٸك تاپپاعانىن, سوندىقتان ەسكەري انت پەن پرەزيدەنتتٸڭ جارلىعىن بٸر مەزگٸلدە ورىنداي المايتىنىن جازعان دەپ حابارلايدى New York Times گازەتٸ.
ترامپ سپەنسەرگە تۆيتتەر ارقىلى العىس ايتتى. ول سونىمەن قاتار ەسكەري-تەڭٸز ۆەدومستۆونىڭ جاڭا باسشىسى وتستاۆكاداعى كونتر ادميرال كەننەت برەيتۋەيت بولاتىنىن, ال گاللاحەر بارشا قۇرمەتپەن وتستاۆكاعا كەتەتٸنٸن جازدى.
