مەملەكەت باسشىسى قاسىم-جومارت توقاەۆ مۇعالٸمدەردٸ كەسٸبي مەرەكەسٸمەن قۇتتىقتاپ, قازاقستانداعى بٸلٸم بەرۋ سالاسىنىڭ دامۋىنا توقتالدى, دەپ حابارلايدى ult.kz.
پرەزيدەنتتٸڭ ايتۋىنشا, قازٸر قازاقستاندا 4 ميلليوننان استام وقۋشى بار. ياعني ەلٸمٸزدٸڭ ەربٸر بەسٸنشٸ ازاماتى مەكتەپتە بٸلٸم الىپ جاتىر.
مەملەكەت باسشىسى سوڭعى جەتٸ جىلدا ەلٸمٸزدە 1 ميلليوننان استام وقۋشىعا ارنالعان 1342 مەكتەپ سالىنعانىن اتاپ ٶتتٸ.
«سوڭعى جەتٸ جىلدا ەلٸمٸزدە 1 ميلليوننان استام وقۋشىعا ارنالعان 1342 مەكتەپ سالىندى. بيىل تاعى 101 مەكتەپ سالىنىپ جاتىر», – دەدٸ قاسىم-جومارت توقاەۆ.
پرەزيدەنت «كەلەشەك مەكتەپتەرٸ» ۇلتتىق جوباسى اياسىندا بٸلٸم بەرۋ مەكەمەلەرٸنٸڭ جاڭا ستاندارتى قالىپتاسقانىن ايتتى. ونىڭ اياسىندا زاماناۋي ينفراقۇرىلىمى بار مەكتەپتەر بوي كٶتەرٸپ جاتىر.
بٷگٸندە 460 مىڭ وقۋشىعا ارنالعان 217 مەكتەپ سالىنعان. ونىڭ 84-ٸ, ياعني شامامەن 40 پايىزى اۋىلدىق جەردە ورنالاسقان.
قاسىم-جومارت توقاەۆ اۋىل مەن قالا مەكتەپتەرٸندە بالالارعا بٸردەي ساپالى بٸلٸم بەرٸلۋٸ قاجەت ەكەنٸن اتاپ ٶتتٸ.
سونىمەن قاتار پرەزيدەنت مەكتەپتەرگە جاساندى ينتەللەكت جٷيەسٸنە نەگٸزدەلگەن ارنايى ساباقتاردى جاپپاي ەنگٸزۋ باعدارلاماسى ٸسكە اسىپ جاتقانىن ايتتى.
«جالپى, ايماقتاردا مەكتەپ تاپشىلىعى مەسەلەسٸ بولماۋى كەرەك. ٶيتكەنٸ تاعى دا قايتالاپ ايتامىن, بۇل – مەملەكەتتٸڭ بولاشاعىنا ەسەر ەتەتٸن ٶتە ماڭىزدى فاكتور», – دەدٸ مەملەكەت باسشىسى.
توقاەۆ ٶركەنيەتتٸ ەلدٸڭ قۋاتى تابيعي بايلىعىمەن ەمەس, ەڭ الدىمەن, ادام كاپيتالىنىڭ ساپاسىمەن ٶلشەنەتٸنٸن اتاپ ٶتتٸ.
مەملەكەت باسشىسى ۇستازدارعا ەڭبەگٸ ٷشٸن العىس ايتىپ, ولاردى كەسٸبي مەرەكەسٸمەن قۇتتىقتادى.
