تٷركٸستان وبلىسى, تٶلەبي اۋدانىندا نٶسەرلٸ جاۋىن سالدارىنان سۋ شايعان ٷيلەر بوي كٶتەرۋدە. اپاتتى دەپ تانىلعان 38 باسپانا تولىق سٷرٸلٸپ, بٷگٸندە 28 ٷيدٸڭ ٸرگەتاسى قالانعان, دەپ حابارلايدى "ۇلت اقپارات".
قايتا سالىنىپ جاتقان ٷيلەردٸڭ قۇرىلىسىمەن تٶتەنشە جاعدايعا قاتىستى قۇرىلعان كوميسسييانىڭ تٶراعاسى, وبلىس ەكٸمٸنٸڭ ورىنباسارى مەيٸرجان مىرزاليەۆ تانىسىپ قايتتى. ول مەردٸگەرلەرمەن كەزدەسٸپ, قۇرىلىستىڭ ساپالى اتقارىلۋى بويىنشا بٸرقاتار تاپسىرمالاردى جٷكتەدٸ. بٷگٸندە بۇل اۋماقتا قۇرىلىسشىلار بٸرنەشە ٷيدٸڭ قابىرعاسىن قالاۋعا كٸرٸسٸپ كەتكەن. ال, سۋ شايعان اۋماقتا قۇرىلىس جۇمىستارىن شٸلدە ايىنا دەيٸن اياقتاۋ جوسپارلانۋدا. بۇل جۇمىستار ايماق باسشىسى ٶمٸرزاق شٶكەەۆتٸڭ تۇراقتى باقىلاۋىندا.
ايتا كەتەيٸك, تولاسسىز جاۋعان نٶسەر جاۋىننىڭ سالدارىنان تٶلەبي اۋدانىنداعى ٶزەندەردٸڭ سۋ دەڭگەيٸ كٶتەرٸلگەن بولاتىن. نەتيجەسٸندە 6 ەلدٸ مەكەندەگٸ 200-دەن استام تۇرعىن ٷيلەردٸڭ اۋلاسىنا سۋ كٸرگەن بولاتىن. تٶتەنشە جاعدايدىڭ زارداپتارىن جويۋ جۇمىستارى شۇعىل تٷردە قولعا الىنعان. سونىڭ ارقاسىندا سۋ شايعان 4 كٶپٸرگە ەكٸ تەۋلٸكتٸڭ ٸشٸندە ٶتكەلدەر ورناتىلىپ, 32 شاقىرىم ارىق-اتىز تازارتىلعان. 3,5 مىڭ قاپپەن ارىق ەرنەۋلەرٸنٸڭ دەڭگەيٸ كٶتەرٸلٸپ, 4,2 شاقىرىم قاشىرتقى قازىلدى. قازٸر اۋدان تۇرعىندارى ٷشٸن ەشقانداي قاۋٸپ جوق. جەرگٸلٸكتٸ دەڭدەيدەگٸ تٶتەنشە جاعداي سالدارىنان قيىندىققا كەز بولعان تۇرعىندار كٶپ ۇزاماي باسپانالارىنا قايتا ورالاتىن بولادى.
