تەۋەلسٸز مەملەكەتتەر دوستاستىعى پوستكەڭەستٸك كەڭٸستٸكتەگٸ اۋقىمدى اپاتتاردىڭ الدىن الۋدا ماڭىزدى رٶل اتقاردى. بۇل تۋرالى تمد ۇيىمىنا مٷشە مەملەكەتتەر باسشىلارى كەڭەسٸنٸڭ كەزەكتٸ وتىرىسىندا قازاقستان پرەزيدەنتٸ قاسىم-جومارت توقاەۆ ايتتى, دەپ حابارلايدى قازاقپارات.
«وسىدان تۋرا 30 جىل بۇرىن قازاقستاننىڭ تۇڭعىش پرەزيدەنتٸ نۇرسۇلتان نازارباەۆتىڭ باستاماسىمەن الماتىدا مەملەكەتتەر باسشىلارىنىڭ تاريحي كەزدەسۋٸ ٶتٸپ, وندا الماتى دەكلاراتسيياسى قابىلدانعان بولاتىن. وسىناۋ تاعدىرشەشتٸ قۇجات جاڭا تەۋەلسٸز مەملەكەتتەردٸڭ كٶپقىرلى ىنتىماقتاستىعىنا مىعىم نەگٸز قالادى. بٷگٸندە دوستاستىق پوستكەڭەستٸك كەڭٸستٸكتەگٸ اۋقىمدى اپاتتاردىڭ الدىن الۋدا ماڭىزدى رٶل اتقارىپ, حالىقتارىمىز اراسىنداعى ٶزارا بايلانىستاردى ساقتاۋعا سەپتٸگٸن تيگٸزدٸ. تمد-نىڭ بەدەلدٸ حالىقارالىق ۇيىمعا اينالۋى دا ٶتە ماڭىزدى. وسى جىلداردىڭ ٸشٸندە تمد كەڭٸستٸگٸندە ورتاق كٷش-جٸگەردٸڭ ارقاسىندا كووپەراتسييانىڭ شىنايى تەتٸكتەرٸ قۇرىلدى, قوماقتى نورماتيۆتٸك-قۇقىقتىق بازا قالىپتاستى. ىنتىماقتاستىقتىڭ بارلىق دەرلٸك سالاسىندا بٸرەگەي تەجٸريبە قالىپتاستى», - دەدٸ مەملەكەت باسشىسى.
قر پرەزيدەنتٸ دوستاستىق بەلسەندٸ ساياسي ديالوگتى دامىتۋعا, قاۋٸپسٸزدٸك سالاسىنداعى ىنتىماقتاستىقتى نىعايتۋعا قىزمەت ەتٸپ, ساۋدا-ەكونوميكالىق قارىم-قاتىناستى دامىتۋعا جاعداي جاسايتىندىعىن باسا ايتتى.
«ەلدەرٸمٸزدٸڭ تيٸمدٸ ينتەگراتسيياسى تمد-دا ەركٸن ساۋدا ايماعىن قۇرۋعا سەپتٸگٸن تيگٸزدٸ. دوستاستىق قامقورلىعىمەن مەدەني-گۋمانيتارلىق ىنتىماقتاستىقتى دامىتۋداعى قادامدار دا جوعارى باعاعا لايىق. بٸزدٸڭ كەزدەسۋمٸز تمد ەلدەرٸنٸڭ كٶپقىرلى ٶزارا ٸس-قيمىلىن قورىتىندىلاپ, جاڭا مەجەسٸن اشادى», - دەدٸ قاسىم-جومارت توقاەۆ.
