سىرتقى ٸستەر مينيسترٸ مۇحتار تٸلەۋبەردٸ مىسىرداعى قازاقستاندىق ديپلوماتتىڭ قازاسىنا بايلانىستى تٸلشٸلەردٸڭ سۇراعىنا جاۋاپ بەردٸ, دەپ حابارلايدى قازاقپارات.
«ەزٸرگە تەرگەۋ جٷرٸپ جاتىر. تەرگەۋ نەتيجەسٸ بٸزدٸڭ جاققا بەرٸلگەن جوق. سوندىقتان كٷتە تۇرايىق. ولار (ٸس-ماتەريالدارى) قازٸر ەگيپەتتٸڭ باس پروكۋراتۋراسىندا, سول ەلدٸڭ سىرتقى ٸستەر مينيسترلٸگٸ ارقىلى بٸزگە بەرٸلەدٸ. جاڭا جىلعا دەيٸن, وسى اپتانىڭ سوڭى نەمەسە كەلەسٸ اپتادا مارقۇمنىڭ دەنەسٸ ەلگە جەتكٸزٸلەدٸ دەپ كٷتۋدەمٸز», - دەيدٸ مۇحتار تٸلەۋبەردٸ ٷكٸمەت وتىرىسىنان كەيٸن.
مۇحتار تٸلەۋبەردٸنٸڭ ايتۋىنشا, سۋيتسيد - ەڭ بٸرٸنشٸ نۇسقا رەتٸندە قاراستىرىلىپ جاتىر.
ەستەرٸڭٸزگە سالا كەتەيٸك, بۇعان دەيٸن سٸم ەگيپەتتە ٶز قىزمەتكەرٸنٸڭ قايتىس بولعانىن راستاعان بولاتىن.
كەيبٸر اقپارات قۇرالدارى قازاقستاندىق ديپلوماتتىڭ ٶلٸمٸنٸڭ جۇمباق مەن-جايى تۋرالى حابارلاعان ەدٸ. اتاپ ايتقاندا, ە. جولداسوۆتىڭ كٸرەبەرٸستە قولدارى ارتىنا بايلانىپ, ٶلٸ كٷيٸندە تابىلعانى تۋرالى اقپارات جارييالاندى.
ال قر سىرتقى ٸستەر مينيسترلٸگٸنٸڭ رەسمي ٶكٸلٸ ايبەك سماديياروۆ قازاقستان رەسپۋبليكاسىنىڭ ەگيپەتتەگٸ ەلشٸلٸگٸنٸڭ قىزمەتكەرٸ ەلامان جولداسوۆتىڭ قازاسىنا قاتىستى قاۋەسەتكە تٷسٸنٸك بەردٸ. ونىڭ ايتۋىنشا, مارقۇمنىڭ دەنەسٸندە ەشقانداي داق, كٶگەرۋ, قانداي دا بٸر جاراقات بولماعان. اياق-قولى بايلانباعان.
