قازاقستاندىق زارينا ديياس اۋسترالييا اشىق چەمپيوناتىنىڭ ٷشٸنشٸ اينالىمىنا شىقتى, - دەپ حابارلايدى قازاقپارات.
دٷنيەجٷزٸلٸك رەيتينگتە 73-ورىندا تۇرعان ز.ديياس ەكٸنشٸ اينالىمدا ەلەمنٸڭ 58-راكەتكاسى, رەسەيلٸك اننا بلينكوۆامەن كەزدەستٸ.
بۇعان دەيٸن 21 جاستاعى ا.بلينكوۆا ٶتكەن جىلى بەيجٸڭ تۋرنيرٸنٸڭ ٸرٸكتەۋ سايىسىندا 1993 جىلعى ز.ديياستى 6:2, 7:5 ەسەبٸمەن ۇتقان ەدٸ. ال بيىل قىتايداعى شەنچجەن دوداسىندا زارينا 6:1, 6:7 (9:11), 6:4 ەسەبٸمەن ەسە قايىرعان بولاتىن.
بٸرٸنشٸ پارتييادا قازاقستاندىق تەننيسشٸ 4:2 ەسەبٸمەن العا شىققانىمەن, سول باسىمدىلىقتى ۇستاپ تۇرا الماي, جەڭٸلٸپ قالدى – 4:6.
ەسەسٸنە ەكٸنشٸ سەتتە 6:3 ەسەبٸمەن قارىمتا قايىردى. بۇل پارتييا كەزٸندە جاڭبىرعا بايلانىستى ٷزٸلٸس ورىن الدى.
شەشۋشٸ, ٷشٸنشٸ پارتييادا زارينا برەيكپەن 2:0 ەسەبٸمەن العا شىققانىمەن, قارسىلاسى قاتارىنان ٷش گەيمدٸ الدى. دەگەنمەن زارينا سول بويدا قايتا تەڭەستٸرٸپ, ٶزٸ العا كەتتٸ – 4:3. سودان كەيٸن ەسەپ 5:4 بولعان كەزدە ا.بلينكوۆا دوپ بەرگەندە, ەكٸنشٸ ماتچبولىن سەتتٸ پايدالاندى – 6:4.
اسا تارتىستى ماتچ 2 ساعات 8 مينۋتقا سوزىلدى.
ز.ديياس ٷشٸنشٸ اينالىمدا ەلەمنٸڭ ونىنشى, وسى جارىستىڭ 9-راكەتكاسى, نيدەرلاندى ٶكٸلٸ كيكي بەرتەنس نەمەسە رەيتينگتە 163-ساتىداعى اۋسترالييالىق ارينا روديونوۆانىڭ بٸرەۋٸمەن شەبەرلٸك بايقاسادى.
ەسكە سالا كەتەيٸك, بۇدان بۇرىن اۋسترالييا بٸرٸنشٸلٸگٸنٸڭ ٷشٸنشٸ اينالىمىنا شىققان ەلەنا رىباكينانىڭ ەلەمنٸڭ بٸرٸنشٸ راكەتكاسىمەن كەزدەسەتٸنٸن جازعان بولاتىنبىز.
