قازاقستاندىق, ەلەمنٸڭ 28-راكەتكاسى يۋلييا پۋتينتسەۆا ادەلايدا (اۋسترالييا) تۋرنيرٸنٸڭ ەكٸنشٸ اينالىمىنا شىقتى, دەپ حابارلايدى "ۇلت اقپارات".
وسى جارىستىڭ 7-راكەتكاسى بولىپ تٸركەلگەن قازاقستاندىق تەننيسشٸ العاشقى اينالىمدا دٷنيەجٷزٸلٸك رەيتينگتە 54-ورىندا تۇرعان گەرمانييالىق لاۋرا زيگەمۋندپەن كەزدەستٸ.
بٸرٸنشٸ پارتييادا يۋ.پۋتينتسەۆا برەيك جاساپ, جەڭٸسكە جەتە الدى – 6:4.
ەكٸنشٸ سەتتە ەسەپ 2:1 بولعان مەزەتتە قازاقستاندىق تەننيسشٸ برەيككە قول جەتكٸزدٸ. الايدا ل.زيگەمۋند سول بويدا قارىمتا قايىرىپ, تارازى باسىن تەڭەستٸردٸ – 3:3. دەگەنمەن يۋ.پۋتينتسەۆا ماتچتى تاعى بٸر برەيكپەن بٸتٸردٸ – 6:4.
بٸرشاما تارتىستى ٶتكەن بەسەكە 1 ساعات 49 مينۋتقا سوزىلدى.
يۋلييا شيرەك فينالعا شىعۋ ٷشٸن رەيتينگتە 292-ساتىداعى اۋسترالييالىق ستورم سەندەرسپەن تالاسادى. ول باستاپقى كەزدەسۋٸندە وتانداسى, ەلەمنٸڭ 74-راكەتكاسى ايلا تومليانوۆيچتٸ 6:1, 6:2 ەسەبٸمەن تٸزە بٷكتٸردٸ.
ەلەمنٸڭ 1-راكەتكاسى, اۋسترالييالىق ەشلي بارتي باستاعان تەننيسشٸلەر قاتىسىپ جاتقان دودا 27 اقپاندا مەرەگە جەتەدٸ. جالپى جٷلدە قورى – 535 مىڭ اقش دوللارى. ٶتكەن جىلى وسى تۋرنيردە فينالدا ۋكراينالىق دايانا ياسترەمسكايانى ۇتقان ە.بارتي چەمپيون اتانعان بولاتىن.
