قازاقستاننىڭ بٸرٸنشٸ, ەلەمنٸڭ 30-راكەتكاسى ەلەنا رىباكينا اۋستراليياداعى حوبارت WTA تۋرنيرٸنٸڭ فينالىنا شىقتى, دەپ حابارلايدى "ۇلت اقپارات".
وسى جارىستىڭ ٷشٸنشٸ راكەتكاسى بولىپ تٸركەلگەن 20 جاستاعى قازاقستاندىق سپورتشى جارتىلاي فينالدا ۇلىبريتانييالىق حيتەر ۋوتسونمەن كٷش سىناستى.
قازٸرگٸ كەزدە رەيتينگتە 101-ساتىدا تۇرعانىمەن, 27 جاستاعى ح.ۋوتسون – ٷش مەرتە WTA جارىستارىندا جەڭٸمپاز اتانعان, سونىڭ ٸشٸندە 2015 جىلى وسى حوبارتتا ٷزدٸك شىققان تٸسقاققان تەننيسشٸ. سول كەزدە ول رەيتينگتە 38-ورىنعا كٶتەرٸلگەن ەدٸ.
كەزدەسۋدٸ تابىستى باستاعان ە.رىباكينا بٸرٸنشٸ پارتييانى جەڭٸسپەن تەمامدادى – 6:3.
ەسەسٸنە ەكٸنشٸ سەتتە قارسىلاسى 5:2 ەسەبٸمەن العا كەتتٸ. بۇدان كەيٸن قازاقستاندىق تەننيسشٸ ەسەپتٸ قىسقارتقانىمەن, تەڭەستٸرە المادى – 4:6.
ٷشٸنشٸ, شەشۋشٸ پارتييا بارىسىندا ە.رىباكينا مەديتسينالىق كٶمەككە دە جٷگٸندٸ. دەگەنمەن ەسەپ 5:4 بولعاندا, بەسەكەنٸ برەيكپەن اياقتاي بٸلدٸ – 6:4.
تارتىستى ماتچ 2 ساعات 11 مينۋتقا سوزىلدى.
ە.رىباكينا فينالدا قىتايلىق, ەلەمنٸڭ 40-ىنشى, وسى دودانىڭ 4-راكەتكاسى چجان شۋايمەن باس جٷلدەنٸ ساراپقا سالادى. ول جارتىلاي فينالدا 22 جاستاعى رەسەيلٸك ۆەرونيكا كۋدەرمەتوۆانى 6:3, 6:4 ەسەبٸمەن تٸزە بٷكتٸردٸ.
بۇل – ە.رىباكينانىڭ بيىلعى ەكٸنشٸ فينالى. ٶتكەن اپتادا قىتايداعى شەنچجەن WTA تۋرنيرٸنٸڭ فينالىندا رەسەيلٸك ەكاتەرينا الەكساندروۆاعا جول بەرگەن بولاتىن.
ەسكە سالا كەتەيٸك, بۇدان بۇرىن ەلەنا رىباكينانىڭ حوبارت تۋرنيرٸنٸڭ جارتىلاي فينالىنا شىققانىن, اۋسترالييا اشىق چەمپيوناتىندا قازاقستاندىق تەننيسشٸلەردٸڭ قارسىلاستارى انىقتالعانىن, دميتريي پوپكونىڭ ٸرٸكتەۋ سايىستارىنىڭ فينالىنا جولداما العانىن جازعان بولاتىنبىز.
