Qazaqstannyń birinshi, álemniń 30-raketkasy Elena Rybakina Aýstraliiadaǵy Hobart WTA týrniriniń finalyna shyqty, dep habarlaidy "Ult aqparat".
Osy jarystyń úshinshi raketkasy bolyp tirkelgen 20 jastaǵy qazaqstandyq sportshy jartylai finalda ulybritaniialyq Hiter Ýotsonmen kúsh synasty.
Qazirgi kezde reitingte 101-satyda turǵanymen, 27 jastaǵy H.Ýotson – úsh márte WTA jarystarynda jeńimpaz atanǵan, sonyń ishinde 2015 jyly osy Hobartta úzdik shyqqan tisqaqqan tennisshi. Sol kezde ol reitingte 38-orynǵa kóterilgen edi.
Kezdesýdi tabysty bastaǵan E.Rybakina birinshi partiiany jeńispen támamdady – 6:3.
Esesine ekinshi sette qarsylasy 5:2 esebimen alǵa ketti. Budan keiin qazaqstandyq tennisshi esepti qysqartqanymen, teńestire almady – 4:6.
Úshinshi, sheshýshi partiia barysynda E.Rybakina meditsinalyq kómekke de júgindi. Degenmen esep 5:4 bolǵanda, básekeni breikpen aiaqtai bildi – 6:4.
Tartysty match 2 saǵat 11 minýtqa sozyldy.
E.Rybakina finalda qytailyq, álemniń 40-ynshy, osy dodanyń 4-raketkasy Chjan Shýaimen bas júldeni sarapqa salady. Ol jartylai finalda 22 jastaǵy reseilik Veronika Kýdermetovany 6:3, 6:4 esebimen tize búktirdi.
Bul – E.Rybakinanyń biylǵy ekinshi finaly. Ótken aptada Qytaidaǵy Shenchjen WTA týrniriniń finalynda reseilik Ekaterina Aleksandrovaǵa jol bergen bolatyn.
Eske sala keteiik, budan buryn Elena Rybakinanyń Hobart týrniriniń jartylai finalyna shyqqanyn, Aýstraliia ashyq chempionatynda qazaqstandyq tennisshilerdiń qarsylastary anyqtalǵanyn, Dmitrii Popkonyń irikteý saiystarynyń finalyna joldama alǵanyn jazǵan bolatynbyz.
