تەننيس: دميتريي پوپكو اقش-تاعى تۋرنيردٸڭ شيرەك فينالىنا شىقتى

قازاقستاندىق دميتريي پوپكو ورلاندو (اقش) چەللەندجەر تۋرنيرٸنٸڭ شيرەك فينالىنا شىقتى, دەپ حابارلايدى "ۇلت اقپارات".

ەلەمنٸڭ 172-راكەتكاسى د.پوپكو ەكٸ كەزدەسۋٸن جەڭٸسپەن تەمامدادى. 

قازاقستاندىق تەننيسشٸ الدىمەن رەيتينگتە 245-ورىندا تۇرعان امەريكالىق نوي رۋبيندٸ 6:1, 6:2 ەسەبٸمەن وڭاي ۇتتى.

ال رەيتينگتە نەبەرٸ 954-ساتىدا تۇرعان تاعى بٸر امەريكالىق زاكاري سۆايدپەن ٶتكەن تارتىستى ماتچ ٷش ساعاتتان استام ۋاقىتقا سوزىلدى. مۇندا د.پوپكو 7:5, 1:6, 7:5 ەسەبٸمەن قارسىلاسىنىڭ مەسەلٸن قايىردى.

د.پوپكو جارتىلاي فينالعا شىعۋ ٷشٸن ەلەمنٸڭ 137-راكەتكاسى, ٷندٸستاندىق پرادجنەش گۋننەسۆارانمەن تالاسادى.

جۇپتىق سىندا تۋرنيردٸڭ 2-راكەتكاسى بولىپ تٸركەلگەن قازاقستاندىقتار اندرەي گولۋبەۆ پەن الەكساندر نەدوۆەسوۆ تا شيرەك فينالعا شىقتى. ولار رەسەيلٸك تەيمۋراز گاباشۆيلي مەن امەريكالىق دەنيس نوۆيكوۆتٸ 6:7 (4:7), 6:2, 10:5 ەسەبٸمەن تٸزە بٷكتٸردٸ. ەندٸ جارتىلاي فينالعا شىعۋ ٷشٸن د.پوپكو مەن كانادالىق پيتەر پولانسكي جۇبىمەن كەزدەسەدٸ. د.پوپكو مەن پ.پولانسكي بۇعان دەيٸن امەريكالىقتار كريستوفەر يۋبەنكس پەن برەندون ناكاشيمانى 3:6, 6:2, 10:6 ەسەبٸمەن جولدان تايدىردى.