فوتو: Sputnik / ۆلاديسلاۆ ۆودنەۆ
قارجى مينيسترٸ ەرۇلان جاماۋباەۆ تەڭگە كٷرت قۇلدىراعان كەزدە دوللار ساتىپ العان قازاقستاندىقتاردى ۇتىلىپ قالعاندار دەپ اتادى, دەپ حابارلايدى Sputnik قازاقستان.
ٷكٸمەت كۋلۋارىندا جۋرناليستەر ناقتىلانعان بيۋدجەتتە دوللار باعامىنىڭ 460 تەڭگە بولىپ بەكٸتٸلۋٸ ۇلتتىق ۆاليۋتانىڭ ەلسٸرەۋٸن مويىنداۋ ەمەس پە دەپ سۇرادى.
"بٸز بيۋدجەتكە بولجامدى باعام ەمەس, ەسەپتٸك باعامدى ەنگٸزەمٸز. ۆاليۋتا اعىنىن, يندەكساتسييانى, باعام ايىرماسىن بەرٸبٸر دە ەسەپتەۋ كەرەك. سول سەبەپتٸ بٸز بٸر دوللاردى 460 تەڭگە دەپ الدىق. مەن بۇل جەردە ەلدەكٸم جەڭٸلٸستٸ مويىندادى نەمەسە قانداي بٸر "كاتاستروفا" بولدى دەپ ويلامايمىن", - دەپ جاۋاپ بەردٸ جاماۋباەۆ.
مينيستر دوللار 500 تەڭگەدەن اسقان كەزدە شەتەلدٸك ۆاليۋتا ساتىپ العاندار قازٸر ۇتىلىپ قالعانىن ايتتى.
"ۆاليۋتا بٸر دوللارعا 500 تەڭگەگە دەيٸن شارىقتاعانى ەستەرٸڭٸزدە شىعار. ەشقانداي "كاتاستروفا" بولعان جوق قوي, كەرٸسٸنشە, تەڭگە ٶز باعامىن قايتاردى. سول كەزدە ۆاليۋتا باعامىنا الدانىپ, دوللار ساتىپ العاندار ۇتىلىپ قالدى. مەن كەشٸرٸم سۇرايمىن, ەرينە, بٸراق قازٸر ولار ۇتىلعاندار, ال بەرٸ تىنىشتالعانىن كٷتٸپ, ەلٸپتٸڭ ارتىن باققاندار, كەرٸسٸنشە, ۇتقاندار", - دەدٸ ول.
