تەجٸكستان سىرتقى ٸستەر مينيسترٸ سيرودجيددين مۋحريددين 8 قىركٷيەكتە اۋعانستان مەسەلەسٸنە ارنالعان ۆيرتۋال كەزدەسۋگە قاتىسىپ, "تاليبان" راديكال توبىنىڭ (قازاقستاندا تىيىم سالىنعان قوزعالىس) پانجشەرگە شابۋىلىن ايىپتادى.
بۇل كەزدەسۋدٸ اقش پەن گەرمانييا ۇيىمداستىرعان. وعان تەجٸكستاننىڭ, پەكٸستاننىڭ, ساۋد ارابيياسىنىڭ, تٷركييانىڭ, ۇلىبريتانييانىڭ سىرتقى ٸستەر مينيسترلەرٸ, سونىمەن بٸرگە ەو, ناتو جەنە بۇۇ باسشىلارى قاتىستى.
پانجشەردەگٸ ۇرىس مەسەلەسٸن تٸلگە تيەك ەتكەن تەجٸك مينيسترٸ تەلٸپتەر ٷشٸنشٸ بٸر ەلدٸڭ ەۋە كٷشتەرٸنٸڭ كٶمەگٸمەن شاتقالداعى كٶپتەگەن تەجٸكتٸ ٶلتٸردٸ دەپ مەلٸمدەدٸ. الايدا مينيستر ٷشٸنشٸ مەملەكەتتٸ اتامادى.
مۇنىڭ الدىندا ٷندٸستاننىڭ بۇقارالىق اقپارات قۇرالدارى پەكٸستاننىڭ ەسكەري تٸكۇشاقتارى مەن ۇشقىشسىز ۇشاقتارى تەلٸپتەردٸڭ پانجشەرگە شابۋىلى كەزٸندە ۇلتتىق قارسىلىق مايدانىنىڭ شەپتەرٸن اتقىلادى دەپ حابارلاعان. اۋعانستاننىڭ كٶپتەگەن قالاسىندا پەكٸستانعا قارسى نارازىلىق اكتسييالارى ٶتتٸ.
دەگەنمەن پەكٸستان ەسكەرٸنٸڭ ٶكٸلٸ پەكٸستاندىق دروندار پانجشەردٸ اتقىلادى دەگەن مەلٸمەتتٸ جوققا شىعاردى.
تەجٸكستاننىڭ سىرتقى ٸستەر مينيسترٸ حالىقارالىق قاۋىمداستىقتى تەلٸپتەرگە ىقپال ەتٸپ, داعدارىستان شىعۋدىڭ ساياسي شەشٸمٸن تابۋعا ٷندەدٸ.
"ەلەمدٸك قاۋىمداستىق جيىرما جىلدان بەرٸ اۋعانستاندا تەرتٸپ ورناتۋدىڭ جولىن تاپپاي, بۇل ەلدە ونداعان مىڭ سودىردى "مۇرا" رەتٸندە قالدىرىپ كەتتٸ" دەپ مەلٸمدەدٸ تەجٸك مينيسترٸ.
بيىل تامىزدىڭ ورتاسىندا تەلٸپتەر اۋعانستاننىڭ بارلىق دەرلٸك اۋماعىن باسىپ الىپ, كابۋلعا ۇرىسسىز كٸردٸ.
7 قىركٷيەكتە "تاليبان" جاڭا ٷكٸمەتتٸڭ قۇرامىن جارييالادى. مەملەكەتتٸك جوعارى باسشىسى بولىپ 60 جاستاعى حايباتۋللا احۋنزادا جارييالاندى.
بٸر دە بٸر مەملەكەت تاليبان ٷكٸمەتٸن ەزٸرگە رەسمي تٷردە مويىنداعان جوق, الايدا بٸرنەشە مەملەكەت, سونىڭ ٸشٸندە كٶرشٸ ٶزبەكستان, جاڭا ٷكٸمەتتٸڭ قۇرىلعانىن قۇپتادى.
