كۋەگەرلەر جولداعان سۋرەت. جامبىل وبلىسىنداعى ەسكەري قويما
جامبىل وبلىسى بايزاق اۋدانىندا ورنالاسقان ەسكەري قويمادا ەلٸ دە جارىلىستار بولىپ جاتىر. كۋەگەرلەر سۋرەتتەر مەن ۆيدەولاردى جولدادى, - دەپ حابارلايدى Tengrinews.kz.
كۋەگەرلەردٸڭ ايتۋىنشا, ەسكەري قويما جاقتاعى جارىلىستار ەلٸ دە جالعاسىپ جاتىر. جارىلىس تٸپتٸ تاراز قالاسى تۇرعىندارىنا ەستٸلگەن.
مۇنىڭ الدىندا قورعانىس مينيسترلٸگٸنٸڭ باسپاسٶز قىزمەتٸ ەسكەري قويمادان ٶرت شىققانىن راستاعان ەدٸ.
"جامبىل وبلىسى بايزاق اۋدانىندا ورنالاسقان ەسكەري بٶلٸمدە ساعات 19.00 شاماسىندا قويمالاردىڭ بٸرٸنٸڭ جانىندا ٶرت شىقتى. ٶرت سالدارىنان بەلگٸلەنبەگەن زاتتار جارىلدى. ٶرتتٸ سٶندٸرۋگە بٶلٸمنٸڭ ٶرت سٶندٸرۋ كوماندالارى, شىنجىر تاباندى ٶرت سٶندٸرۋ ماشينالارى تارتىلدى. ولارعا جامبىل وبلىسى بويىنشا تجد ٶرت سٶندٸرۋشٸلەرٸ كٶمەك كٶرسەتٸپ جاتىر", - دەپ حابارلادى مينيسترلٸكتٸڭ باسپاسٶز قىزمەتٸ.
