بٷگٸن ٷكٸمەت وتىرىسىندا پرەمەر-مينيستر اسقار مامين كانالدار مەن سۋ قويمالارىن سالۋ جەنە رەكونسترۋكتسييالاۋ تۋرالى ايتىپ بەردٸ, دەپ حابارلايدى قازاقپارات.
«مەملەكەت باسشىسى قاسىم-جومارت كەمەلۇلى توقاەۆ سۋارمالى جەرلەردٸڭ اۋدانىن 2025 جىلعا قاراي 2,2 ملن گەكتارعا دەيٸن, ال 2030 جىلعا قاراي 3 ملن گەكتارعا دەيٸن كەڭەيتۋ بويىنشا ناقتى مٸندەتتٸ ايقىندادى. بٷگٸندە حالىق پەن ەكونوميكا سالالارى ٷشٸن سۋ الۋدىڭ جالپى كٶلەمٸ شامامەن 25 تەكشە كيلومەتردٸ قۇرايدى. جىل ٶتكەن سايىن قاجەتتٸلٸكتەر ارتا بەرەتٸن بولادى جەنە بۇل - سۋدى تيٸمدٸ پايدالانۋدى, ەڭ جاڭا تەحنولوگييالاردى ەنگٸزۋدٸ, سالانى تسيفرلاندىرۋدى تالاپ ەتەدٸ. تەك اۆتوماتتاندىرىلعان بٶلۋ مەن تاسىمالداۋ ەسەبٸنەن سۋدىڭ ارتىق جۇمسالۋى جىل سايىن 1,2 تەكشە شاقىرىمعا قىسقارادى», - دەدٸ مامين.
وسى رەتتە, الداعى بەس جىلدىق كەزەڭدە 120 كانالدى رەكونسترۋكتسييالاۋ مەن جاڭا 9 ٸرٸ سۋ قويماسىن سالۋ جٶنٸندە شارالار قابىلدانادى.
«سونىمەن قاتار, ٶڭٸرلٸك دەڭگەيدە جايىلىمدىق جەرلەردەگٸ گيدروتەحنيكالىق قۇرىلىستاردى, قۇدىقتاردى جاڭعىرتۋدى, جٶندەۋدٸ جەنە ولارعا قىزمەت كٶرسەتۋدٸ جٷرگٸزۋ قاجەت. جالپى, سۋ قويمالارىن سالۋ جەنە جۇمىس ٸستەپ تۇرعاندارىن جاڭعىرتۋ, سونداي-اق سۋ ٷنەمدەۋ تەحنولوگييالارىن قولدانۋ – جىل سايىن 6,4 تەكشە شاقىرىم كٶلەمٸندە قوسىمشا سۋ رەسۋرستارىن جيناۋدى قامتاماسىز ەتەدٸ. بۇل شارالار «جاسىل قازاقستان» ۇلتتىق جوباسىندا دا بار. قابىلدانىپ جاتقان شارالاردى قولداۋدى ۇسىنامىن», - دەدٸ پرەمەر-مينيستر.
