پارلامەنت مەجٸلٸسٸنٸڭ جالپى وتىرىسىندا «قازاقستان رەسپۋبليكاسى مەن سولتٷستٸك ماكەدونييا رەسپۋبليكاسى اراسىنداعى سوتتالعان ادامداردى بەرۋ تۋرالى شارتتى راتيفيكاتسييالاۋ تۋرالى» زاڭ جوباسى ماقۇلداندى, دەپ حابارلايدى "ۇلت اقپارات".
«ۇسىنىلىپ وتىرعان شارتتىڭ ماڭىزى ەرەكشە. ەڭ الدىمەن, كونستيتۋتسييا بەكٸتكەن مەملەكەتتٸڭ شەتەلدە جٷرگەن ازاماتتارىن قورعاۋ مٸندەتٸن ورىنداۋعا باعىتتالعان. ەلٸمٸزدەن تىس جەردە قىلمىستىق جاۋاپقا تارتىلىپ, سوتتالعان ازاماتتارعا تۋعان جەرٸندە جازاسىن ٶتەۋگە مٷمكٸنشٸلٸك بەرەدٸ», - قر باس پروكۋرورىنىڭ ورىنباسارى مارات احمەتجانوۆ.
ونىڭ ايتۋىنشا, سوتتالعانداردى بەرۋ ٷشٸن ول ادام ەكٸ ەلدٸڭ بٸرٸنٸڭ ازاماتى بولۋى تيٸس. ەكٸ ەلدە دە قىلمىس بولىپ سانالاتىن ەرەكەت ٷشٸن سوتتالسا, جازاسىن ٶز ەلٸندە ٶتەي الادى.
سونىمەن قاتار, سوتتالعان ادامنىڭ جازباشا كەلٸسٸمٸ كەرەك.
بۇدان بٶلەك, قۇجاتتا سوتتالعان ادام بەرٸلمەيتٸن جاعدايلار ايقىندالعان.
