سۋرەت اشىق دەرەككٶزدەن الىندى
جەتٸسۋ وبلىسىنىڭ شولاقاي اۋىلىندا 15 جاستاعى قۇرالايدى زورلاپ, ٶلتٸرٸپ, ارتىنان ٶرتەپ جٸبەرگەن قىلمىسكەر ٶمٸر بويىنا سوتتالدى, دەپ حابارلايدى قازاقپارات.
جانتٷرشٸگەرلٸك قىلمىس جاساعان 39 جاستاعى رۋستام احمەتوۆكە جەتٸسۋ وبلىسىنىڭ قىلمىستىق ٸستەر جٶنٸندەگٸ مامانداندىرىلعان اۋدانارالىق سوتىنىڭ سۋدياسى باقىت ەرماحانوۆ وسىنداي جازا كەستٸ.
ٷكٸم كەزٸندە سۋديا جاعا ۇستاتار قىلمىستىڭ جاي-جاپسارىن باياندادى. تەرگەۋ دەرەگٸنشە, سوتتالۋشى الدىمەن 15 جاستاعى قۇرالايدى زورلاپ, ايۋاندىقپەن ٶلتٸرگەن. سودان سوڭ قىزدىڭ جٷرەك تۇسىنان ٷش رەت پىشاق سالعانى انىقتالعان. كەيٸن بٸر مەتر تەرەڭدٸكتە جەر قازىپ, قىز بالانىڭ ۇيالى تەلەفونىن سىندىرىپ, مەيٸتتٸ ٶرتەپ, كٶمٸپ تاستاعان ەكەن.
ەستەرٸڭٸزگە سالا كەتەيٸك, دٷيٸم جۇرتتى دٷر سٸلكٸندٸرگەن قىلمىس وسىدان تۋرا التى اي بۇرىن بولعان ەدٸ. ٸز-تٷسسٸز جوعالىپ كەتكەن قۇرالاي قيسابەكتٸ بٷكٸل شولاقاي اۋىلىنىڭ تۇرعىندارى جانۇشىرا ٸزدەگەن. الايدا, تەك 8 كٷننەن كەيٸن قىز بالانىڭ مەيٸتٸ تابىلعان.
مٷردە سول اۋىلدان ٷش جارىم شاقىرىم جەردە ورنالاسقان قىلمىسكەردٸڭ قىستاعىنىڭ ماڭىنان تابىلعان ەدٸ.
ايتا كەتسەك, ٶمٸر بويىنا سوتتالعان رۋستام احمەتوۆتىڭ بۇل - العاشقى قىلمىسى ەمەس. ول بۇعان دەيٸن 14 جاستاعى جاسٶسپٸرٸممەن جىنىستىق قاتىناسقا تٷسٸپ, وعان ٷيلەنٸپ, جازادان قۇتىلعان. ەكٸنشٸ قىلمىسىندا ەيەل ادامدى زورلاپ, 5 جىلعا سوتتالعان بولاتىن. ەندٸ ٶمٸر بويىنا باس بوستاندىعىنان ايىرىلعان ول جەبٸرلەنۋشٸ تاراپتىڭ سۇراۋى بويىنشا 10 ميلليون تەڭگە مورالدىق ٶتەماقى تٶلەۋگە مٸندەتتەلدٸ.
