شىعىس قازاقستان وبلىسىنا سەۋٸر ايىندا كوروناۆيرۋسقا قارسى ۆاكتسينانىڭ 80 مىڭنان استام دوزاسى جەتكٸزٸلمەك, دەپ حابارلايدى "ۇلت اقپارات".
شقو دەنساۋلىق ساقتاۋ باسقارماسى باسشىسىنىڭ ورىنباسارى نۇرلانعازى يبراەۆ ونلاين فورماتتا ٶتكەن باسپاسٶز مەسليحاتىندا ٶڭٸردەگٸ ۆاكتسيناتسييالاۋ جۇمىستارىنىڭ قالاي جٷرگٸزٸلٸپ جاتقاندىعىن ايتىپ بەردٸ.
«سەۋٸر ايىنىڭ سوڭىنا دەيٸن حالىقتى جاپپاي ۆاكتسيناتسييالاۋعا قاجەتتٸ دوزالار جەتكٸزٸلەدٸ. ادام كٶپ جينالاتىن جەرلەردە ۆاكتسيناتسييا پۋنكتتەرٸ جۇمىسىن باستايدى. قازٸرگٸ ۋاقىتتا وبلىستا رەسەيلٸك «سپۋتنيك V» پرەپاراتىنىڭ بٸرٸنشٸ جەنە ەكٸنشٸ كومپونەنتتەرٸنٸڭ 36 400 دوزاسى بار», - دەدٸ ول.
نۇرلانعازى يبراەۆتىڭ ايتۋىنشا, ۆاكتسينالاردىڭ جەتكٸزٸلۋٸ كەستەسٸ جاسالىپ, ونى بٸرىڭعاي ديستريبيۋتور سك-فارماتسييا جٷزەگە اسىرۋدا. وسى ايدىڭ سوڭىنا دەيٸن تاعى 82200 دوزا جەتكٸزٸلەدٸ.
«سودان كەيٸن ٶڭٸر جۇرتشىلىعى ۆاكتسيناتسييا پۋنكتتەرٸنە شاقىرىلا باستايدى. قازٸر وبلىس ەكٸمٸ دانيال احمەتوۆتٸڭ تاپسىرماسىمەن بۇل ورىندار انىقتالۋدا. وندا جۇمىس ٸستەيتٸن مەديتسينا قىزمەتكەرلەرٸن دايىندىقتان ٶتكٸزەمٸز», - دەدٸ باسقارما باسشىسىنىڭ ورىنباسارى.
ايتا كەتەيٸك, بٷگٸندە شىعىس قازاقستاندا 12 425 ادام كوروناۆيرۋسقا قارسى ۆاكتسينانىڭ بٸرٸنشٸ كومپونەنتٸن العان.
