شىعىس قازاقستان وبلىسىندا بٸر تٷندە 26 ادام قار قۇرساۋىنان قۇتقارىلدى, دەپ حابارلايدى "ۇلت اقپارات".
شقو تٶتەنشە جاعدايلار دەپارتامەنتٸ باسپاسٶز قىزمەتٸنٸڭ مەلٸمەتٸنە سٷيەنسەك, بٸرٸنشٸ قوڭىراۋ «ماقانشى-ٷرجار» تاسجولىندا Toyota Highlander كٶلٸگٸ جىراعا قۇلاپ كەتكەن جٷرگٸزۋشٸدەن تٷستٸ. وقيعا ورنىنا كەلگەن №54 ٶرت سٶندٸرۋ بٶلٸمٸنٸڭ قىزمەتكەرلەرٸ ارنايى تەحنيكامەن كٶلٸكتٸ سٷيرەپ شىعاردى. وسىلايشا, 3 ادام ماقانشىعا قاراي قايتا بەت العان.
«سونداي-اق «ماقانشى-بلاگودارنوە» تاسجولىندا قارعا باتقان 2 كٶلٸكتە 4 ادام بولعان. قۇتقارۋشىلار بٸردەن سول جەرگە جەتٸپ ولاردى ەۆاكۋاتسييالادى. دەل وسىنداي جاعداي تارباعاتاي اۋدانىنداعى اقجار-شٸلٸكتٸ تاسجولىندا تٸركەلگەن. قار قۇرساۋىندا قالعان 2 كٶلٸكتەگٸ 4 ازاماتتى №52 ٶرت سٶندٸرۋ بٶلٸمٸنٸڭ قىزمەتكەرلەرٸ ماڭايداعى قىستاققا جەتكٸزدٸ», - دەپ حابارلادى ۆەدومستۆو ٶكٸلدەرٸ.
ال «ومبى-مايقاپشاعاي» تاسجولىندا جولدا قالعان 6 كٶلٸكتٸڭ ٸشٸندە «گازەل» مەن كاماز بولعان. قۇتقارۋشىلار كٶلٸكتەردٸ قاردان شىعارىپ, 15 ادامدى زايسان قالاسىنا دەيٸن اپارىپ تاستادى.
جالپى 1 تٷننٸڭ ٸشٸندە قار قۇرساۋىندا قالعان 26 ادام قۇتقارىلدى.
