الماتى وبلىسى شامالعان ستانساسىندا بولعان جول اپاتىنان سوڭ جاياۋ جٷرگٸنشٸلەرگە ارنالعان كٶپٸر سالىندى, دەپ حابارلايدى قازاقپارات.
بٷگٸن وبلىس ەكٸمٸ اماندىق باتتالوۆتىڭ قاتىسۋىمەن كٶپٸردٸڭ سالتاناتتى اشىلۋى بولدى.
«بٷگٸن بٸز وسى ەرەكشە قۇرىلىس نىسانىن پايدالانۋعا بەرٸپ وتىرمىز. كٶپٸردٸڭ ۇزىندىعى 59-60 مەتر بولسا, بيٸكتٸگٸ 9 مەترگە جەتتٸ. ەگدە ادامدار مەن جاس بالالارعا ارنالعان ەكٸ ليفت اشىلدى», - دەدٸ ەكٸم.
ونىڭ ايتۋىنشا, قۇرىلىسقا جەرگٸلٸكتٸ بيۋدجەتتەن 365 ملن تەڭگە جۇمسالعان. قۇرىلىس نىسانى وبلىستىق تۇرعىن ٷي كوممۋنالدىق شارۋاشىلىق مەنشٸگٸنە بەرٸلەدٸ.
كٶپٸردٸڭ اشىلۋىندا جٸبەك جول اۋىلىنىڭ تۇرعىنى وكسانا ۆيكتوروۆنا تۇرعىندار تاراپىنان ريزاشىلىعىن بٸلدٸردٸ.
«كٶپٸر قۇرىلىسىن كٶپ كٷتتٸك. جىل سايىن جٷرەتٸن پويىزدار سانى ارتىپ كەلەدٸ. بالالارىمدى مەكتەپكە جٸبەرگەندە ۋايىمدايتىنمىن. پاندەمييا كەزٸندە دە كٶپٸر قۇرىلىسى توقتاماعانى قۋانتادى. نىسان ۋاقىتىندا بەرٸلدٸ. وبلىس ەكٸمٸنە العىسىمدى بٸلدٸرەمٸن», - دەدٸ ول.
ەسكە سالساق, 2019 جىلى 15 قىركٷيەكتە شامالعان ستانتسيياسىندا رەلستٸڭ ٷستٸندە تۇرىپ قالعان جولاۋشىلار اۆتوبۋسىمەن جولاۋشىلار پويىزى سوقتىعىسقان بولاتىن.
سالدارىنان اۆتوبۋس جٷرگٸزۋشٸسٸ سول جەردە مەرت بولىپ, تاعى 3 ادام قاراساي اۋداندىق اۋرۋحاناسىنىڭ جانساقتاۋ بٶلٸمٸنە تٷستٸ.
سوت جازانى تاعايىنداۋ كەزٸندە ستانتسييا كەزەكشٸسٸ احمەدجانوۆتىڭ ٶز كٸنەسٸن مويىنداپ, شىن ٶكٸنۋٸن, ونىڭ جاسىن, وتباسىلىق جاعدايىن ەسكەرە وتىرىپ, ونى 3 جىل 6 ايعا شارتتى تٷردە سوتتاعان ەدٸ.
وسى وقيعادان كەيٸن شامالعان ستانتسيياسىندا ەستاكادا تٷرٸندە جول ٶتپەسٸن سالۋ شەشٸلدٸ. جٷرگٸنشٸلەر كٶپٸرٸنٸڭ قۇرىلىسى دا باستالدى.
