شىمكەنتتەگٸ اۋرۋحانالاردىڭ بٸرٸندە بالاسىن اياۋسىز ۇرىپ جاتقان ەيەلدٸڭ ۆيدەوسى تارادى. جانتٷرشٸگەرلٸك كادرلاردى جەرگٸلٸكتٸ تۇرعىن Instagram-پاراقشاسىندا جارييالادى, - دەپ حابارلايدى Tengrinews.kz اگەنتتٸگٸ.
ۆيدەودان ەيەل ادام اۋرۋحانادا بالاسىن باسقا ەيەلدەردٸڭ كٶزٸنشە ۇرىپ, بىلاپىت سٶزدەر ايتىپ جاتقانىن كٶرۋگە بولادى. ەيەل ادام بالاسىنىڭ جىلاپ جاتقانىنا دا مەن بەرمەيدٸ. "سەنٸ تۋعانشا تۋماعانىم ارتىق ەدٸ", - دەيدٸ ۆيدەوداعى ەيەل.
ۆيدەو جەلٸدە تاراپ كەتكەننەن كەيٸن اۋرۋحاناعا شىمكەنتتٸڭ بالا قۇقىقتارى جٶنٸندەگٸ ۋەكٸلٸ جاننەتا جازىقباەۆا كەلدٸ. ونىڭ سٶزٸنشە, ەيەل ادام نەمەرە اعاسىنا تۇرمىسقا شىققان ەكەن. قان ارالاسىپ, ەكەۋٸنٸڭ ەكٸ بالاسى قايتىس بولىپ كەتكەن, بٸرەۋٸنە بالالاردىڭ تسەرەبرالدى سال اۋرۋى دەگەن دياگنوز قويىلعان. ەيەل ادام ۆيدەوعا تٷسٸپ قالعان ەرەكەتٸن تٷسٸندٸرگەن. ونىڭ سٶزٸنشە, ەيەل بالانى بايقاماي ۇرىپ جٸبەرگەن.
"بالانى نە ٷشٸن ۇردىڭىز" دەپ سۇراعانىمدا ول بايقاماي ۇرىپ جٸبەرگەنٸن ايتتى. "قالاي بايقاماي ۇرىپ جٸبەرەسٸز" دەپ ەدٸم, وعان سول سەتتە بٸرەۋ حابارلاسىپ قالعانىن ايتتى. سٶيتٸپ, بالا جىلاپ كەتكەن. ول ەيەلدٸڭ بەس بالاسى بولعان ەكەن, ەكەۋٸ قايتىس بولعان. بٸرٸنشٸ بالاسى قۇسىعىنا شاشالىپ ٶلگەن, ەكٸنشٸ دۇرىس جەتٸلمەي قايتىس بولعان", - دەيدٸ جاننەتا جازىقباەۆا.
وقيعا شىمكەنت قالالىق بالالار كلينيكالىق اۋرۋحاناسىندا بولعان. اۋرۋحانادا بۇل دەرەك بويىنشا تەكسەرٸس جٷرٸپ جاتىر. باستاپقىدا بالا ٶكپە اۋرۋىنا بايلانىستى اۋرۋحاناعا تٷسكەن. بٷگٸندە بالانىڭ جاعدايى ورتاشا, حاتتاما بويىنشا ەم قابىلداپ جاتىر.
"بالا 16 قاراشادا پنەۆمونييامەن تٷسكەن. بٶلٸم باسشىسى بۇل جاعداي تۋرالى حاباردار. ول بالانىڭ اناسىمەن تٷسٸندٸرۋ جۇمىستارىن جٷرگٸزدٸ, ەيەلگە پسيحولوگييالىق كٶمەك كٶرسەتٸلدٸ. بالانىڭ دەنەسٸ كٶگەرمەگەن", - دەيدٸ شىمكەنت قالالىق بالالار كلينيكالىق اۋرۋحاناسى باس دەرٸگەرٸنٸڭ ەمدەۋ بٶلٸمٸ بويىنشا ورىنباسارى قالامقاس داۋمباەۆا.
شىمكەنتتٸڭ پوليتسييا دەپارتامەنتٸ ٶكٸلدەرٸ بۇل جايتقا قاتىستى ەزٸرگە پٸكٸر بٸلدٸرمەدٸ.
