قر بعم بٸلٸم جەنە عىلىم سالاسىنداعى باقىلاۋ كوميتەتٸنٸڭ تٶرايىمى گٷلزات كٶبەنوۆا كەيبٸر جوعارى وقۋ ورىندارىندا انىقتالعان كەمشٸلٸكتەردٸ ايتتى, دەپ حابارلايدى قازاقپارات.
«مينيسترلٸك ساپاسىز بٸلٸم بەرەتٸن جوعارى وقۋ ورىندارىنا قاتىستى مەسەلەنٸ شەشۋ بويىنشا تيٸستٸ جۇمىستاردى اتقارىپ كەلەدٸ. قازٸرگٸ كەزدە مەملەكەتتٸك باقىلاۋ كەسٸپكەرلٸك كودەكسكە سەيكەس جٷرگٸزٸلەدٸ. بٸرٸنشٸ باعىتى - پروفيلاكتيكالىق باقىلاۋ. وسىنىڭ نەتيجەسٸنٸڭ نەگٸزٸندە جوعارى وقۋ ورنىنا ەكٸ مٷمكٸندٸك قوسىمشا بەرٸلەدٸ. ەڭ باستىسى, بۇل جەردە جوعارى وقۋ ورىندارىنىڭ ماقساتى – اكادەمييالىق دەربەستٸككە قاراماستان بٸلٸم سالاسىنداعى زاڭنامانى بۇزباۋ ەرٸ كەمشٸلٸكتەرگە جول بەرمەۋ. ەگەر پروفيلاكتيكالىق باقىلاۋدىڭ نەتيجەسٸ بويىنشا كەمشٸلٸكتەر انىقتالسا, جوعارى وقۋ ورنىنا ەكٸنشٸ مٷمكٸندٸك بەرٸلەدٸ», - دەدٸ كٶبەنوۆا ورتالىق كوممۋنيكاتسييالار قىزمەتٸندە.
وسى ورايدا ول تەكسەرٸس جٷرگٸزٸلگەننەن كەيٸن قايتادان تالاپتاردى بۇزۋ انىقتالىپ جاتسا, وندا ٷشٸنشٸ تەكسەرٸس جٷرگٸزٸلەتٸنٸن ناقتىلادى. تەك ٷشٸنشٸ تەكسەرٸستەن سوڭ تيٸستٸ شەشٸم قابىلدانادى. ەكٸمشٸلٸك كودەكسكە سەيكەس كەمشٸلٸككە قاراي تيٸستٸ باپپەن شارا قولدانىلادى.
سونىمەن قاتار ول جوسپاردان تىس تەكسەرۋلەرگە توقتالدى.
«مينيسترلٸككە اتا-انالاردان, ستۋدەنتتەردەن, وقىتۋشىلاردان ٶتٸنٸشتەر كەلٸپ تٷسٸپ جاتادى. وسى ٶتٸنٸشتەرگە قاتىستى مينيسترلٸك ٶز تاراپىنان كٶتەرٸلگەن مەسەلەلەر تۇرعىسىندا تەكسەرٸس جٷرگٸزەدٸ. كٶبٸنە ارىز جازاتىندار ٶزدەرٸنٸڭ مەلٸمەتتەرٸن (اتى-جٶنٸن) كٶرسەتپەيدٸ, ياعني ارىزدان كەيٸن ٶزدەرٸنە كەسٸرٸ تيەدٸ دەپ ويلايدى. اتاپ ايتقاندا, ەگەر كەمشٸلٸكتەر بولسا, سٸزدەر الاڭداتاتىن مەسەلەلەر بويىنشا مٸندەتتٸ تٷردە مينيسترلٸككە جەنە تيٸستٸ بايلانىس جەلٸسٸنە حابارلاسا الاسىزدار», - دەدٸ كوميتەت باسشىسى.
«تەكسەرٸستەر نەتيجەسٸنە توقتالساق, شىن مەنٸندە جوعارى وقۋ ورىندارىنىڭ كەيبٸرٸندە تيٸستٸ جاعداي جاسالماعان. جوو-دا وقىتۋشىسىز وقۋ ٷردٸسٸ قالاي جٷرگٸزٸلەدٸ? بۇل تۇرعىدا سىرتتان شاقىرتىلعان وقىتۋشىلار قامتىلعان. ولار باسقا جەردە جۇمىس ٸستەيدٸ دە, قوسىمشا جوعارى وقۋ ورنىندا ساباق بەرەدٸ. وسى ورايدا قانداي ساپا بولادى? كەلگەن وقىتۋشىلاردىڭ تيٸستٸ بٸلٸكتٸلٸگٸ بولماي جاتادى. بٸلٸم بەرۋ باعدارلامالارىنىڭ ساپاسىنا بايلانىستى سۇراقتار بار. ەرينە, قۋاناتىن جاعدايلار دا بار, ٷش جىلدىڭ ٸشٸندە بٸلٸم بەرۋ باعدارلامالارىنىڭ ساپاسى 3 ەسەگە ٶسكەن. دەگەنمەن, ەلٸ دە كەيبٸر وقۋ ورىندارى تيٸستٸ جۇمىستاردى اتقارۋى كەرەك», - دەدٸ گٷلزات كٶبەنوۆا.
مۇنىمەن قوسا ول كەيبٸر جوو-لار ماتەريالدىق-تەحنيكالىق بازاسى جاعىنان اقساپ تۇرعانىن ايتتى.
