QR BǴM Bilim jáne ǵylym salasyndaǵy baqylaý komitetiniń tóraiymy Gúlzat Kóbenova keibir joǵary oqý oryndarynda anyqtalǵan kemshilikterdi aitty, dep habarlaidy QazAqparat.
«Ministrlik sapasyz bilim beretin joǵary oqý oryndaryna qatysty máseleni sheshý boiynsha tiisti jumystardy atqaryp keledi. Qazirgi kezde memlekettik baqylaý Kásipkerlik kodekske sáikes júrgiziledi. Birinshi baǵyty - profilaktikalyq baqylaý. Osynyń nátijesiniń negizinde joǵary oqý ornyna eki múmkindik qosymsha beriledi. Eń bastysy, bul jerde joǵary oqý oryndarynyń maqsaty – akademiialyq derbestikke qaramastan bilim salasyndaǵy zańnamany buzbaý ári kemshilikterge jol bermeý. Eger profilaktikalyq baqylaýdyń nátijesi boiynsha kemshilikter anyqtalsa, joǵary oqý ornyna ekinshi múmkindik beriledi», - dedi Kóbenova Ortalyq kommýnikatsiialar qyzmetinde.
Osy oraida ol tekseris júrgizilgennen keiin qaitadan talaptardy buzý anyqtalyp jatsa, onda úshinshi tekseris júrgiziletinin naqtylady. Tek úshinshi tekseristen soń tiisti sheshim qabyldanady. Ákimshilik kodekske sáikes kemshilikke qarai tiisti bappen shara qoldanylady.
Sonymen qatar ol jospardan tys tekserýlerge toqtaldy.
«Ministrlikke ata-analardan, stýdentterden, oqytýshylardan ótinishter kelip túsip jatady. Osy ótinishterge qatysty ministrlik óz tarapynan kóterilgen máseleler turǵysynda tekseris júrgizedi. Kóbine aryz jazatyndar ózderiniń málimetterin (aty-jónin) kórsetpeidi, iaǵni aryzdan keiin ózderine kesiri tiedi dep oilaidy. Atap aitqanda, eger kemshilikter bolsa, sizder alańdatatyn máseleler boiynsha mindetti túrde ministrlikke jáne tiisti bailanys jelisine habarlasa alasyzdar», - dedi komitet basshysy.
«Tekserister nátijesine toqtalsaq, shyn máninde joǵary oqý oryndarynyń keibirinde tiisti jaǵdai jasalmaǵan. JOO-da oqytýshysyz oqý úrdisi qalai júrgiziledi? Bul turǵyda syrttan shaqyrtylǵan oqytýshylar qamtylǵan. Olar basqa jerde jumys isteidi de, qosymsha joǵary oqý ornynda sabaq beredi. Osy oraida qandai sapa bolady? Kelgen oqytýshylardyń tiisti biliktiligi bolmai jatady. Bilim berý baǵdarlamalarynyń sapasyna bailanysty suraqtar bar. Árine, qýanatyn jaǵdailar da bar, úsh jyldyń ishinde bilim berý baǵdarlamalarynyń sapasy 3 esege ósken. Degenmen, áli de keibir oqý oryndary tiisti jumystardy atqarýy kerek», - dedi Gúlzat Kóbenova.
Munymen qosa ol keibir JOO-lar materialdyq-tehnikalyq bazasy jaǵynan aqsap turǵanyn aitty.
