قازاقستاندا ەلەكترساموكاتتارعا قاتىستى جاڭا جول قوزعالىسى تالاپتارى كٷشٸنە ەندٸ. 25 تامىزدان باستاپ ساموكاتپەن تروتۋار مەن جاياۋ جٷرگٸنشٸلەر جولىندا جٷرۋگە تىيىم سالىندى. ال جولدىڭ جٷرٸس بٶلٸگٸندە ەلەكترساموكاتتى تەك 18 جاسقا تولعان, جٷرگٸزۋشٸ كۋەلٸگٸ بار جەنە قورعانىش دۋلىعاسىن تاققان ازاماتتار عانا جٷرگٸزە الادى, دەپ حابارلايدى ult.kz.
باس پروكۋراتۋرا جاڭا تالاپتاردى تٷسٸندٸرٸپ, ەرەجەنٸ بۇزعان جاعدايدا جاۋاپكەرشٸلٸك قاراستىرىلاتىنىن ەسكە سالدى.
ەندٸ ەلەكترساموكاتپەن جٷرۋ ٷشٸن ۆەلوسيپەد جولىن نەمەسە ۆەلوسيپەد جولاعىن پايدالانۋ قاجەت. ولار بولماعان جاعدايدا جول قوزعالىسى قاعيدالارىنا سەيكەس جٷرٸس بٶلٸگٸنٸڭ وڭ جاق شەتٸمەن نەمەسە جول جيەگٸمەن قوزعالۋعا رۇقسات ەتٸلەدٸ.
جٷرٸس بٶلٸگٸندە ساموكات جٷرگٸزەتٸن ادام 18 جاستان اسقان بولۋى, تيٸستٸ ساناتتاعى جٷرگٸزۋشٸ كۋەلٸگٸ مەن قورعانىش دۋلىعاسى بولۋى كەرەك.
سونىمەن قاتار جولدى جاياۋ جٷرگٸنشٸلەر ٶتكەلٸ ارقىلى كەسٸپ ٶتكەن كەزدە ساموكات, ۆەلوسيپەد جەنە موپەد جٷرگٸزۋشٸلەرٸ كٶلٸكتەن تٷسٸپ, ونى جەتەكتەپ ٶتۋگە تيٸس.
جاڭا تالاپ بويىنشا جولاۋشى تاسىمالداۋعا, رٶلدٸ ۇستاماي تەلەفون پايدالانۋعا جەنە تەۋلٸكتٸڭ قاراڭعى ۋاقىتىندا جارىق شاعىلىستىراتىن ەلەمەنتتەرسٸز جٷرۋگە تىيىم سالىنادى.
باس پروكۋراتۋرا بۇل ٶزگەرٸستەردٸڭ جول قاۋٸپسٸزدٸگٸن كٷشەيتۋ قاجەتتٸگٸنەن تۋىنداعانىن اتاپ ٶتتٸ. سەبەبٸ ەلەكترلٸ كٶلٸك قۇرالدارىنىڭ تانىمالدىعى ارتقان سايىن ولار قاتىساتىن جول اپاتتارى دا كٶبەيٸپ وتىر.
جىل باسىنان بەرٸ موپەد جٷرگٸزۋشٸلەرٸنٸڭ كٸنەسٸنەن 390 جول اپاتى تٸركەلگەن. ونىڭ سالدارىنان 33 ادام قازا تاۋىپ, 461 ادام جاراقات العان. سونىمەن قاتار ۆەلوسيپەدشٸلەردٸڭ كٸنەسٸنەن 169, شاعىن ەلەكتر كٶلٸك قۇرالدارىن باسقارۋشىلاردىڭ قاتىسۋىمەن 97, ال ەلەكترساموكات جٷرگٸزۋشٸلەرٸنٸڭ كٸنەسٸنەن 47 جول اپاتى بولعان.
وسى جول-كٶلٸك وقيعالارىندا 329 كەمەلەتكە تولماعان بالا زارداپ شەگٸپ, 10 بالا قازا تاپقان.
ساموكات جٷرگٸزۋشٸلەرٸنٸڭ ٶزدەرٸ دە جولداعى قاۋٸپتەن تىس قالمايدى. باس پروكۋراتۋرانىڭ مەلٸمەتٸنشە, ەلەكترساموكات جٷرگٸزۋشٸلەرٸن اۆتوكٶلٸك قاعىپ كەتۋٸ سالدارىنان تٶرت ادام قازا تاۋىپ, تاعى 300-گە جۋىق ادام جاراقات العان.
قاداعالاۋ ورگانى ەسٸرەسە ادام كٶپ جٷرەتٸن جەرلەردە جوعارى جىلدامدىقپەن جٷرۋ قاۋٸپتٸ ەكەنٸن ەسكەرتتٸ.
اۆتوكٶلٸك جٷرگٸزۋشٸلەرٸ دە ساقتىق شارالارىن كٷشەيتۋٸ كەرەك. قيىلىستارعا, اۋلالارعا, جاياۋ جٷرگٸنشٸلەر ٶتكەلدەرٸنە جەنە ساموكات پەن ۆەلوسيپەد پايدالانۋشىلارى جولعا كەنەتتەن شىعۋى مٷمكٸن ۋچاسكەلەرگە جاقىنداعاندا جىلدامدىقتى تٶمەندەتٸپ, جولداعى جاعدايدىڭ ٶزگەرۋٸنە دايىن بولعان جٶن.
