Qazaqstanda elektrsamokattarǵa qatysty jańa jol qozǵalysy talaptary kúshine endi. 25 tamyzdan bastap samokatpen trotýar men jaiaý júrginshiler jolynda júrýge tyiym salyndy. Al joldyń júris bóliginde elektrsamokatty tek 18 jasqa tolǵan, júrgizýshi kýáligi bar jáne qorǵanysh dýlyǵasyn taqqan azamattar ǵana júrgize alady, dep habarlaidy ult.kz.
Bas prokýratýra jańa talaptardy túsindirip, erejeni buzǵan jaǵdaida jaýapkershilik qarastyrylatynyn eske saldy.
Endi elektrsamokatpen júrý úshin velosiped jolyn nemese velosiped jolaǵyn paidalaný qajet. Olar bolmaǵan jaǵdaida jol qozǵalysy qaǵidalaryna sáikes júris bóliginiń oń jaq shetimen nemese jol jiegimen qozǵalýǵa ruqsat etiledi.
Júris bóliginde samokat júrgizetin adam 18 jastan asqan bolýy, tiisti sanattaǵy júrgizýshi kýáligi men qorǵanysh dýlyǵasy bolýy kerek.
Sonymen qatar joldy jaiaý júrginshiler ótkeli arqyly kesip ótken kezde samokat, velosiped jáne moped júrgizýshileri kólikten túsip, ony jetektep ótýge tiis.
Jańa talap boiynsha jolaýshy tasymaldaýǵa, róldi ustamai telefon paidalanýǵa jáne táýliktiń qarańǵy ýaqytynda jaryq shaǵylystyratyn elementtersiz júrýge tyiym salynady.
Bas prokýratýra bul ózgeristerdiń jol qaýipsizdigin kúsheitý qajettiginen týyndaǵanyn atap ótti. Sebebi elektrli kólik quraldarynyń tanymaldyǵy artqan saiyn olar qatysatyn jol apattary da kóbeiip otyr.
Jyl basynan beri moped júrgizýshileriniń kinásinen 390 jol apaty tirkelgen. Onyń saldarynan 33 adam qaza taýyp, 461 adam jaraqat alǵan. Sonymen qatar velosipedshilerdiń kinásinen 169, shaǵyn elektr kólik quraldaryn basqarýshylardyń qatysýymen 97, al elektrsamokat júrgizýshileriniń kinásinen 47 jol apaty bolǵan.
Osy jol-kólik oqiǵalarynda 329 kámeletke tolmaǵan bala zardap shegip, 10 bala qaza tapqan.
Samokat júrgizýshileriniń ózderi de joldaǵy qaýipten tys qalmaidy. Bas prokýratýranyń málimetinshe, elektrsamokat júrgizýshilerin avtokólik qaǵyp ketýi saldarynan tórt adam qaza taýyp, taǵy 300-ge jýyq adam jaraqat alǵan.
Qadaǵalaý organy ásirese adam kóp júretin jerlerde joǵary jyldamdyqpen júrý qaýipti ekenin eskertti.
Avtokólik júrgizýshileri de saqtyq sharalaryn kúsheitýi kerek. Qiylystarǵa, aýlalarǵa, jaiaý júrginshiler ótkelderine jáne samokat pen velosiped paidalanýshylary jolǵa kenetten shyǵýy múmkin ýchaskelerge jaqyndaǵanda jyldamdyqty tómendetip, joldaǵy jaǵdaidyń ózgerýine daiyn bolǵan jón.
