بٷگٸن «كارانتيندەگٸ جۇلدىز» جوباسى اياسىندا سەكەن مايعازيەۆ ونلاين-كونتسەرت بەرەدٸ, دەپ حابارلايدى "ۇلت اقپارات".
«مەدەنيەت جەنە سپورت مينيسترلٸگٸ مەن «قازاقتەلەكوم» اق بٸرلەسٸپ قولعا العان جوبا اياسىندا بٷگٸن قازاقستاندىقتار سەكەن مايعازيەۆتىڭ ەۋەزدٸ ەندەرٸن تىڭدايتىن بولادى. الداعى ۋاقىتتا تىڭدارمانداردىڭ ىستىق ىقىلاسىنا يە بولعان بٸرقاتار ٶنەر مايتالمانىنا الاڭ ۇسىنباقپىز. مەملەكەت باسشىسىنىڭ بٷگٸن بەرگەن باعاسى بٸز ٷشٸن زور جاۋاپكەرشٸلٸك جٷكتەيتٸن ٷلكەن ابىروي. الداعى ۋاقىتتا دا ەلٸمٸزگە تٶتەننەن كەلگەن قيىندىقتى بٸرگە ەڭسەرۋگە ٶز ٷلەسٸمٸزدٸ قوسامىز. #Birgemiz», - دەدٸ مەدەنيەت جەنە سپورت مينيسترٸ اقتوتى رايىمقۇلوۆا مينيسترلٸكتٸڭ Facebook پاراقشاسىندا جارييالانعان اقپاراتتا.
ەلٸمٸزدە تٶتەنشە جاعداي جارييالانىپ, جۇرت قيىندىقتى ەڭسەرۋگە «#Birgemiz» دەپ كٸرٸسكەن تۇستا, مەدەنيەت جەنە سپورت مينيسترلٸگٸ بٸرنەشە ونلاين-جوبانى قولعا العان ەدٸ. ولاردىڭ اراسىندا ٶنەر سٷيەر قاۋىمعا ارنالعان «كارانتيندەگٸ جۇلدىز» جوباسى دا بار. 23-ناۋرىزدان باستاۋ العان جوبا اياسىندا كەشە كٶرەرمەندەر تٸكەلەي ەفيردە ەلٸمٸزدٸڭ ماقتانىشى روزا قۋانىشقىزىنىڭ ەندەرٸن تىڭدادى. ٶزدەرٸنٸڭ ونلاين-كونتسەرتتەرٸن بۇعان دەيٸن جۇبانىش جەكسەنۇلى, جەڭٸس سەيدوللاۇلى, عادٸلبەك جاڭاي بەرگەن بولاتىن. ازعانتاي ۋاقىتتا كٶرەرمەنٸن تاۋىپ, ٶمٸرشەڭدٸگٸن كٶرسەتكەن جۇلدىزدى جوبا ونلاين فورماتتا جالعاسا بەرەدٸ.
ايتا كەتەيٸك, بٷگٸن مەملەكەت باسشىسى قاسىم-جومارت توقاەۆ ەسترادا ەنشٸسٸ روزا رىمباەۆاعا ونلاين-كونتسەرت ٷشٸن العىس بٸلدٸرگەن بولاتىن.
