قازاقستاننىڭ بٸرٸنشٸ, ەلەمنٸڭ 20-راكەتكاسى ەلەنا رىباكينا ۋيمبلدون تۋرنيرٸن جەڭٸسپەن باستادى, دەپ حابارلايدى "ۇلت اقپارات".
وسى «ٷلكەن دۋلىعا» تۋرنيرٸنٸڭ 18-راكەتكاسى بولىپ تٸركەلگەن ە.رىباكينا العاشقى اينالىمدا دٷنيەجٷزٸلٸك رەيتينگٸدە 59-ورىندا تۇرعان فرانتسييالىق كريستينا ملادەنوۆيچپەن كەزدەستٸ.
بۇعان دەيٸن قازاقستاندىق تەننيسشٸ 2019 جىلى ۋيمبلدون جارىسىنىڭ ٸرٸكتەۋ سايىستارىنان اسا الماعان بولاتىن. ال ٶتكەن جىلى پاندەميياعا بايلانىستى ايتۋلى دودا ٶتكەن جوق.
بٸرٸنشٸ پارتييادا ەسەپ 2:1 بولعان مەزەتتە ە.رىباكينا برەيك جاساي بٸلدٸ. وسى باسىمدىلىعىنان سەت بٸتكەنشە ايىرىلعان جوق – 6:4.
ەكٸنشٸ سەتتە قازاقستاندىق سپورتشى قوس بٸردەي برەيكپەن العا كەتتٸ – 3:0. بۇدان كەيٸن ك.ملادەنوۆيچ مەديتسينالىق كٶمەككە جٷگٸندٸ. ەلەنا بۇل پارتييادا قارسىلاسىنا بٸردە-بٸر گەيم بەرگەن جوق – 6:0. ول ماتچ بارىسىندا 7 ەيس جاساپ, 10 برەيك-پوينتتىڭ تٶرتەۋٸن پايدالاندى.
بەسەكە 1 ساعاتقا جۋىق ۋاقىتقا سوزىلدى.
وسىلايشا لوندونداعى «ٷلكەن دۋلىعا» دوداسى قازاقستاندىق تەننيسشٸلەر ٷشٸن سەتتٸ باستالدى.
ە.رىباكينا ەكٸنشٸ اينالىمدا ەلەمنٸڭ 83-راكەتكاسى, جاپونييالىق ميساكي دوي نەمەسە رەيتينگٸدە 120-ساتىداعى امەريكالىق كلەر ليۋدٸڭ بٸرەۋٸمەن شەبەرلٸك بايقاسادى.
ەيەلدەر اراسىندا ۋيمبلدونداعى فينالدىق ماتچ 10 شٸلدەگە بەلگٸلەنگەن. جارىستىڭ 2019 جىلعى چەمپيونى, رۋمىنييالىق سيمونا حالەپ جاراقاتىنا بايلانىستى بيىل قاتىسقان جوق.
