ەلەمدٸك جەنە دەستٷرلٸ دٸن كٶشباسشىلارى VII سەزٸنٸڭ اياسىندا ريم پاپاسى فرانتسيسكتٸڭ قاتىسۋىمەن ٶتەتٸن مەسسا شاراسىنا كەلگەن رەسەيلٸك دٸن قىزمەكتەرٸ شارانى تاريحي ماڭىزى بار وقيعا دەپ اتادى, دەپ حابارلايدى قازاقپارات.
«بۇل شاراعا جالعىز كەلدٸم. مەن - رەسەيدەگٸ گرەك-كاتوليكتەردٸڭ وردەنارياتىنىڭ ٶكٸلٸمٸن. ريم پاپاسىنىڭ ارنايى كەلٸپ, دٸندەستەرٸمەن كەزدەسۋٸ ەرقاشان ماڭىزدى تاريحي وقيعا بولىپ ەسەپتەلەدٸ. پاپانىڭ رەسەيگە كەلە المايتىنى ٶكٸنٸشتٸ. بٸراق بۇل قازاقستانعا كەلٸپ تۇرعان بٸرٸنشٸ ريم پاپاسى ەمەس ەكەنٸن بٸلەمٸز. قايتا قازاقستانعا كەلٸپ ريم پاپاسىمەن كەزدەسە الاتىنىمىز كٶڭٸل قۋانتادى», - دەدٸ پٸرەدار يۆان.
رەسەيلٸك مەيمان استاناداعى اۋا رايىنىڭ مەسساعا كەلۋشٸلەر ٷشٸن جايلى بولىپ تۇرعانىن اتادى.
«قازاقستانعا جيٸ كەلٸپ تۇرامىن, جالپى. بٷگٸن استاناداعى كٷن رايىنىڭ جايماشۋاق بولىپ تۇرۋىن ادام تٸلٸمەن ايتساق, سەيكەستٸك دەۋگە بولاتىن شىعار. ال قۇداي نانىمىمەن ايتساق, جاراتۋشىنىڭ قۇدىرەتٸ دەپ تٷسٸندٸرۋگە بولادى.
ريم پاپاسى بولعان تٷرلٸ كەزدەسۋلەردە, تٷرلٸ ەلدەردە بولدىم. ول كەلگەن كەزدە جەرگٸلٸكتٸ كٷن رايى تٷبەگەيلٸ ٶزگەرەدٸ. 40 گرادۋس اپتاپ كەزٸندە ريم پاپاسىنىڭ دٸني قىزمەت جاساعانى ەسٸمدە قالىپتى. دۇعا باستالعان كەزدە اسپاندى بۇل تورلاپ, كٷن رايى سالقىنداپ شىعا كەلگەن بولاتىن», - دەدٸ دٸني قىزمەتكەر.
ايتا كەتۋ كەرەك, ەكٸ كٷنگە سوزىلاتىن سەزگە 50 ەلدەن 100-دەن استام دەلەگاتسييا, ونىڭ ٸشٸندە يسلام, حريستيان, بۋدديزم, يۋدايزم, يندۋيزم, داوسيزم, زورواستريزم, سينتويزم دٸندەرٸنٸڭ ٶكٸلدەرٸ, سونداي-اق ساياساتكەرلەر مەن قوعام قايراتكەرلەرٸ, حالىقارالىق ۇيىم مٷشەلەرٸ كەلگەن.
دٸني فورۋمعا ارنايى قوناق ريم پاپاسى فرانتسيسكتەن بٶلەك ەل-ازحاردىڭ جوعارعى يمامى احمەد موحاممەد احمەد ات-تايەب, يەرۋساليم پاتريارحى III تەوفيل, اشكەنازدىڭ باس راۆۆينٸ داۆيد لاۋ, يزرايلدٸڭ باس سەفارد راۆۆينٸ يتسحاك يوسيف جەنە باسقا دا دٸني جەتەكشٸلەر, بٸرقاتار حالىقارالىق ۇيىمنىڭ ٶكٸلدەرٸ قاتىسادى.
كەشە كەشكە پرەزيدەنت قاسىم-جومارت توقاەۆ سەزدٸڭ ارنايى قوناعى ريم پاپاسى فرانتسيسكتٸ ەلوردا ەۋەجايىنان كٷتٸپ الدى.
كەيٸننەن قازاقستان پرەزيدەنتٸ مەن ريم پاپاسى ازاماتتىق قوعام جەنە ديپلوماتييالىق كورپۋس ٶكٸلدەرٸمەن كەزدەستٸ.
كەزدەسۋدە كاتوليك شٸركەۋٸنٸڭ باسشىسى قازاقستاننىڭ ٶلٸم جازاسىنان باس تارتقانىنا جوعارى باعا بەرٸپ, قازاقستان كونستيتۋتسيياسىنىڭ نانىم-سەنٸم بوستاندىعىنىڭ كەپٸلٸ ەكەنٸن اتادى.
دٸن كٶشباسشىسى فرانتسيسكتٸڭ ەلٸمٸزگە مەملەكەتتٸك ساپارى ريم پاپاسى يوانن II پاۆەل قازاقستانعا 2001 جىلى كەلگەننەن كەيٸن العاش رەت ٶتٸپ جاتىر. بٷگٸن ول ەلوردادا مەسسا ٶتكٸزەدٸ. وعان 3 مىڭعا جۋىق ادام قاتىسپاق.
