شەكاراشىلار رەسەيدە جوعالعان اۆتوكٶلٸكتەردٸ ٶزبەكستانعا اسىرماي, ەل شەكاراسىندا ۇستادى, دەپ حابارلايدى ۇلتتىق قاۋٸپسٸزدٸك كوميتەتٸنٸڭ شەكارا قىزمەتٸ.
ٶتكەن تٷندە سارىاعاش شەكارا جاساعىنىڭ «قاپلانبەك اۆتو» بٶلٸمشەسٸندە ٶزبەكستانعا قاراي ٶتپەك بولعان «تويوتا Rav 4» اۆتوكٶلٸگٸ ۇستالدى.
«تەكسەرۋ كەزٸندە ونىڭ رەسەي فەدەراتسيياسىندا ٸزدەۋدە جٷرگەن اۆتوكٶلٸك ەكەنٸ انىقتالدى. كٶلٸكتٸڭ جٷرگٸزۋشٸسٸ 1976 جىلى تۋعان تەجٸكستان ازاماتى سارىاعاش اۋداندىق پوليتسييا بٶلٸمٸنە تاپسىرىلدى» دەلٸنگەن حابارلامادا.
ارادا ەكٸ جارىم ساعات ٶتكەندە ٶزبەكستانعا بەت العان تاعى بٸر «تويوتا Rav 4» اۆتوكٶلٸگٸ قولعا تٷستٸ. ول دا رەسەي اۋماعىنان ۇشتى-كٷيلٸ جوعالعان. ونىڭ جٷرگٸزۋشٸسٸ 40 جاستاعى رەسەيلٸك تە پوليتسييا قىزمەتكەرلەرٸنە تابىستالدى.
