رەسەي سىرتقى ٸستەر مينيسترلٸگٸ ليتۆا ارقىلى كالينينگرادقا باراتىن تەمٸرجول ترانزيتٸن دەرەۋ اشۋدى تالاپ ەتتٸ. ونى ليتۆا ەلشٸسٸن شاقىرىپ الىپ ايتقان, دەپ حابارلايدى ازاتتىق.
ليتۆانىڭ ترانزيت تەمٸرجولدى جاپقانىن رەسەي سىرتقى ٸستەر مينيسترلٸگٸ حالىقارالىق قۇقىقتىق مٸندەتتەمەلەرٸنە قايشى كەلەتٸن "ارانداتۋشىلىق", "جاۋ ەرەكەت" دەپ سانايدى.
"ەگەر تاياۋ ارادا رەسەيدٸ ليتۆا ارقىلى كالينينگراد وبلىسىمەن جالعايتىن جٷك ترانزيتٸ تولىق قالپىنا كەلتٸرٸلمەسە, وندا ۇلتتىق مٷددەمٸزدٸ قورعاۋ جٶنٸندەگٸ ەرەكەت قۇقىعىن پايدالانامىز", — دەيدٸ رەسەي سٸم.
پۋتيننٸڭ باسپاسٶز حاتشىسى دميتريي پەسكوۆ ليتۆانىڭ ەرەكەتٸن "بۇرىن-سوڭدى بولماعان جوسىقسىز شەشٸم" دەپ اتادى.
"بۇل شەشٸم, راسىندا, بەرٸنە نۇقسان كەلتٸرەتٸن بۇرىن-سوڭدى بولماعان جوسىقسىز شەشٸم. ەۋروپا وداعىنىڭ ترانزيتكە سالعان سانكتسيياسىنا بايلانىستى ەكەنٸن تٷسٸنٸپ وتىرمىز. ونى دا زاڭسىز دەپ ەسەپتەيمٸز", — دەدٸ ول.
كەيٸننەن ليتۆا سىرتقى ٸستەر مينيسترلٸگٸ ەۋروپا وداعىنىڭ سانكتسييا رەجيمٸنە ەنبەگەن جولاۋشىلار مەن تاۋارلاردىڭ كالينينگراد وببلىسىنا كٸرٸپ-شىعۋىنا كەدەرگٸ جوق ەكەنٸن حابارلادى.
"ليتۆا بۇل ترانزيتكە بٸرجاقتى, جەكە نەمەسە قوسىمشا شەكتەۋ ەنگٸزگەن جوق. ليتۆا ەۋروپا وداعىنىڭ سانكتسيياسىن جٷزەگە اسىرادى", — دەيدٸ ۆەدومستۆو.
ليتۆا 18 ماۋسىمنان باستاپ رەسەيدٸڭ نەگٸزگٸ اۋماعىنان كالينينگرادقا ٶتەتٸن تەمٸرجول جٷكتەرٸنٸڭ ترانزيتٸن توقتاتقان. كٶمٸر, مەتالل, تسەمەنت, اعاش, قۇرىلىس ماتەريالدارى مەن جوعارى تەحنولوگييالى بۇيىمداردى ليتۆاداعى ترانزيت جولمەن الىپ ٶتۋگە تىيىم سالعان. مۇناي ٶنٸمدەرٸنە 10 تامىزعا دەيٸن رۇقسات ەتٸلگەن, ودان كەيٸن مۇناي ٶنٸمدەرٸ دە سانكتسيياعا ٸلٸنۋٸ مٷمكٸن.
ليتۆا سىرتقى ٸستەر مينيسترلٸگٸ باسشىسىنىڭ ورىنباسارى مانتاس ادومەناس قازٸر ليتۆانىڭ كالينيگراد تەمٸرجول ترانزيتٸنە بايلانىستى ەۋروپا وداعىنىڭ شەشٸمٸن كٷتٸپ وتىرعانىن حابارلادى.
كالينينگراد وبلىسىنىڭ گۋبەرناتورى انتون اليحانوۆ ليتۆا ەرەكەتٸن زاڭسىز دەپ اتادى. ونىڭ سٶزٸنشە, وبلىسقا تەمٸرجولمەن كەلەتٸن رەسەي جٷكتەرٸ 40-50 پايىزعا ازايادى. گۋبەرناتور لەنيگراد وبلىسىنداعى ۋست-لۋگا پورتى مەن كالينينگراد تٷبٸندەگٸ بالتىق پورتى اراسىنداعى پاروم قاتىناسىن كٷشەيتۋگە شاقىردى.
