ۇلتتىق ستاتيستيكا بيۋروسىنىڭ مەلٸمەتٸنشە, 2026 جىلعى ماۋسىمدا قازاقستاندا 167 878 اۆتوكٶلٸك ەسەپكە قويىلدى. بۇل مامىر ايىمەن سالىستىرعاندا 13,7%-عا كٶپ, دەپ حابارلايدى ult.kz.
ەسەپكە قويىلعان كٶلٸكتەردٸڭ باسىم بٶلٸگٸن جەڭٸل اۆتوموبيلدەر قۇرادى. ولاردىڭ ٷلەسٸ 87,4%-عا جەتتٸ. سونداي-اق جٷك كٶلٸكتەرٸ – 5,7%, تٸركەمەلەر – 2,4%, موتوتسيكلدەر – 1%, اۆتوبۋستار – 0,9%, ال ٶزگە كٶلٸك تٷرلەرٸ 2,6%-دى قۇرادى.
قوزعالتقىش كٶلەمٸ بويىنشا ماۋسىم ايىندا تٸركەلگەن كٶلٸكتەردٸڭ 34,5%-ىنىڭ قوزعالتقىش كٶلەمٸ 1500–2000 تەكشە سانتيمەتر ارالىعىندا بولدى.
وتىن تٷرٸنە قاراي ەڭ كٶپ تٸركەلگەنٸ – بەنزينمەن جٷرەتٸن كٶلٸكتەر. ولار 136,2 مىڭ بٸرلٸكتٸ نەمەسە جالپى تٸركەلگەن كٶلٸكتەردٸڭ 81,1%-ىن قۇرادى. سونىمەن قاتار:
- ديزەل وتىنىمەن جٷرەتٸن – 10,8 مىڭ;
- ارالاس وتىن تٷرٸن پايدالاناتىن – 11,2 مىڭ;
- ەلەكتر قۋاتىمەن جٷرەتٸن – 2,9 مىڭ;
- گازبەن جٷرەتٸن – 895 كٶلٸك تٸركەلدٸ.
2026 جىلعى 1 شٸلدەدەگٸ جاعداي بويىنشا قازاقستانداعى تٸركەلگەن اۆتوكٶلٸكتەردٸڭ جالپى سانى 6 ملن 25,9 مىڭعا جەتتٸ. ونىڭ ٸشٸندە:
- جەڭٸل اۆتوموبيلدەر – 5,05 ملن (83,9%);
- جٷك كٶلٸكتەرٸ – 493,7 مىڭ (8,2%);
- تٸركەمەلەر – 262,3 مىڭ (4,4%);
- اۆتوبۋستار – 89,5 مىڭ (1,5%);
- موتوتسيكلدەر – 74,2 مىڭ (1,2%).
ٶڭٸرلەر اراسىندا ەڭ ٸرٸ اۆتوپارك الماتى قالاسىندا تٸركەلگەن – 733,3 مىڭ كٶلٸك. ەكٸنشٸ ورىندا الماتى وبلىسى تۇر, مۇندا 646,3 مىڭ اۆتوكٶلٸك ەسەپتە تۇر.
